அன்சாக் (Anzac) புகழ்க்கதை

அன்சாக் மரபு துருக்கியில் (Türkiye) உள்ள கல்லிபோலி தீபகற்பத்தில் உருவாக்கப்பட்டது.

1915 ஏப்ரல் 25 அன்று கல்லிபோலியில் நடந்த தரையிறக்கம், எட்டு மாதங்கள் நீடித்த ஒரு போர் நடவடிக்கையின் தொடக்கத்தைக் குறித்தது; அதில் 26,000 க்கும் மேற்பட்ட ஆஸ்திரேலியர்கள் பாதிக்கப்பட்டனர், அவர்களில் 8000 க்கும் மேற்பட்டோர் கொல்லப்பட்டனர் அல்லது நோயால் இறந்தனர். கல்லிபோலி தீபகற்பத்தில் பணியாற்றியவர்களின் வீரமும் உணர்வும் ஒரு புராணத்தை உருவாக்கின; 'அன்சாக்' ('Anzac') என்ற சொல் ஆஸ்திரேலிய மற்றும் நியூசிலாந்து மொழியின் ஒரு பகுதியாக மாறியது.

1916 ஏப்ரல் 25 அன்று, ஆஸ்திரேலியா, நியூசிலாந்து, இங்கிலாந்து மற்றும் எகிப்தில் இருந்த படைகள் இந்தத் தரையிறக்கத்தின் முதல் ஆண்டு நிறைவைக் கடைப்பிடித்தன. அதன் பிறகு, ஏப்ரல் 25 அன்சாக் தினம் (Anzac Day) என்று அறியப்பட்டது.

1920 களுக்குள், ஆஸ்திரேலியா முழுவதும் அன்சாக் தின விழாக்கள் நடத்தப்பட்டன; மாநிலங்கள் அன்சாக் தினத்தைப் பொது விடுமுறையாக அறிவித்தன. தலைநகரங்களில் பெரிய போர் நினைவுச் சின்னங்கள் கட்டப்பட்டன; நாடு முழுவதும் நகரங்களிலும் ஊர்களிலும் உள்ள நினைவுச் சின்னங்கள், அந்தப் போரிலும் பிற்கால மோதல்களிலும் கொல்லப்பட்ட இளம் ஆண்களுக்கும் பெண்களுக்கும் அஞ்சலியாக அமைகின்றன.

போர்கள், மோதல்கள் மற்றும் அமைதி காக்கும் நடவடிக்கைகளில் பணியாற்றிய அனைவரையும், அவர்களது நண்பர்-உணர்வையும், துன்பத்தை எதிர்கொண்ட உறுதியையும், நமது எதிர்காலத்திற்காக அவர்கள் செய்த தியாகங்களையும் கௌரவிக்கும் நாள் அன்சாக் தினம். போரின் பல்வேறு அர்த்தங்களைப் பற்றிச் சிந்திக்கும் நாளும் அதுவே.

இன்று, அன்சாக் தினம் ஆஸ்திரேலியாவிலும் உலகம் முழுவதிலும் நினைவுகூரப்படுகிறது. திரும்பி வந்த ஆஸ்திரேலியப் படைவீரர்களும் வீராங்கனைகளும், அமைதி காப்பாளர்களும், பிற நாடுகளின் முன்னாள் படைவீரர்களும் அன்சாக் தின அணிவகுப்புகளில் பெருமையுடன் அணிவகுத்துச் செல்கின்றனர்.