சர்வதேச மன்றங்களில் தீவிரப் பங்கேற்பு

ஐக்கிய நாடுகள் அவை (United Nations, UN) 1945-இல் தொடங்கியது முதல் ஆஸ்திரேலியா அதன் செயல்முனைப்புள்ள உறுப்பினராக இருந்து வருகிறது. 1951-ஆம் ஆண்டு ஐ.நா. அகதிகள் மாநாட்டின்படி அகதிகளாக அடையாளம் காணப்பட்டவர்களுக்கு ஆஸ்திரேலியா பாதுகாப்பு அளிக்கிறது. மேலும் ஐ.நா. அமைதிகாப்பு முயற்சிகளுக்கும், வளரும் நாடுகளுக்கான மனிதாபிமான மற்றும் அவசரகால உதவிகளுக்கும் பங்களிக்கிறது; ஐ.நா. கல்வி, அறிவியல் மற்றும் பண்பாட்டு அமைப்பில் வலுவான ஈடுபாடு கொண்டுள்ளது.

1971-இல், ஆஸ்திரேலியா பொருளாதார ஒத்துழைப்பு மற்றும் மேம்பாட்டு அமைப்பின் (Organisation for Economic Cooperation and Development, OECD) முழு உறுப்பினரானது. உலக வர்த்தகத்தை விரிவுபடுத்தும் அதே வேளையில் உலகெங்கும் உள்ள மக்களின் பொருளாதார மற்றும் சமூக நல்வாழ்வை மேம்படுத்துவதே OECD-இன் நோக்கம்.

ஆசிய-பசிபிக் பகுதியில் நெருக்கமான ஒத்துழைப்பை ஆஸ்திரேலியா வலுவாக ஆதரிக்கிறது. அது ஆசிய-பசிபிக் பொருளாதார ஒத்துழைப்பு (Asia-Pacific Economic Cooperation), கிழக்கு ஆசிய உச்சி மாநாடு (East Asia Summit) மற்றும் பசிபிக் தீவுகள் மன்றம் (Pacific Islands Forum) ஆகியவற்றின் செயல்முனைப்புள்ள உறுப்பினர். தென்கிழக்காசிய நாடுகளின் கூட்டமைப்பின் (Association of Southeast Asian Nations) உரையாடல் கூட்டாளியாக இருந்து, அதன் பிராந்திய மன்றத்தில் பங்கேற்கிறது.

டாக்டர் கேத்தரின் ஹாம்லின் AC (Dr Catherine Hamlin AC) (1924–2020)

டாக்டர் கேத்தரின் ஹாம்லின் ஒரு மகப்பேறு மருத்துவர்; இளம் எத்தியோப்பியப் பெண்களை துன்ப வாழ்விலிருந்து காப்பாற்றியதற்காகப் புகழ் பெற்றவர். 1959 முதல், டாக்டர் ஹாம்லின் எத்தியோப்பியாவின் அடிஸ் அபாபாவில் பணியாற்றி, ‘மகப்பேறு ஃபிஸ்டுலா’ (obstetric fistula) எனப்படும் பிரசவக் காயத்தால் பாதிக்கப்பட்ட பெண்களுக்கு உதவினார். இந்த உள் காயம் உள்ள பெண்களால் தங்கள் உடல் இயக்கங்களைக் கட்டுப்படுத்த முடியாது; அவர்கள் அவமானப்பட்டு தங்கள் சமூகங்களிலிருந்து ஒதுக்கப்படுகிறார்கள்.

டாக்டர் ஹாம்லினும் அவரது கணவரும் அடிஸ் அபாபா ஃபிஸ்டுலா மருத்துவமனையை நிறுவினர். அவர்களது முயற்சிகளால் ஆயிரக்கணக்கான பெண்கள் வீடு திரும்பி முழுமையான, ஆரோக்கியமான வாழ்க்கை வாழ முடிந்தது.

1995-இல், டாக்டர் ஹாம்லினுக்கு ஆஸ்திரேலியாவின் மிக உயர்ந்த விருதான ஆஸ்திரேலியப் பட்டத்தின் தோழர் (Companion of the Order of Australia) பட்டம் வழங்கப்பட்டது.