ஆஸ்திரேலிய நோபல் பரிசு பெற்றவர்கள்

அறிவியல் மற்றும் மருத்துவ ஆராய்ச்சிக்காக ஆஸ்திரேலியா புகழ் பெற்றது. கீழ்க்கண்ட ஆஸ்திரேலியர்கள் இத்துறைகளில் நோபல் பரிசை வென்றுள்ளனர்.

• பேராசிரியர் வில்லியம் பிராக் (William Bragg) (1862–1942) மற்றும் லாரன்ஸ் பிராக் (Lawrence Bragg) (1890–1971), இயற்பியலாளர்கள். வில்லியம் பிராக் (தந்தை) மற்றும் லாரன்ஸ் பிராக் (மகன்) ஆகியோர் ‘எக்ஸ்-கதிர்கள் மூலம் படிக அமைப்பை ஆய்வு செய்ததற்கான பங்களிப்புக்காக’ 1915-ஆம் ஆண்டு இயற்பியலுக்கான நோபல் பரிசை இணைந்து வென்றனர்.

• சர் ஹோவர்ட் வால்டர் ஃப்ளோரி (Sir Howard Walter Florey) (1898–1968), நோயியல் நிபுணர். தென் ஆஸ்திரேலியாவின் அடிலெய்டில் பிறந்த ஹோவர்ட் ஃப்ளோரி, ‘பென்சிலினைக் கண்டுபிடித்ததற்கும் பல்வேறு தொற்று நோய்களில் அதன் குணப்படுத்தும் விளைவுக்கும்’ 1945-ஆம் ஆண்டு உடலியல் அல்லது மருத்துவத்துக்கான நோபல் பரிசை (இணைந்து) பெற்றார்.

• சர் ஃப்ராங்க் மேக்ஃபார்லேன் பர்னெட் (Sir Frank Macfarlane Burnet) (1899–1985), மருத்துவ அறிவியலாளர் மற்றும் உயிரியலாளர். விக்டோரியாவில் பிறந்த ஃப்ராங்க் பர்னெட், ‘பெறப்பட்ட நோய் எதிர்ப்புச் சகிப்புத்தன்மையைக் கண்டுபிடித்ததற்காக’ 1960-ஆம் ஆண்டு உடலியல் அல்லது மருத்துவத்துக்கான நோபல் பரிசை (இணைந்து) பெற்றார்.

• சர் ஜான் கேரூ எக்கிள்ஸ் (Sir John Carew Eccles) (1903–97), உடலியல் நிபுணர். ஜான் எக்கிள்ஸ் மெல்பர்னில் பிறந்தார்; ‘நரம்பு உயிரணு சவ்வின் புற மற்றும் மைய பகுதிகளில் தூண்டுதல் மற்றும் தடுப்பில் ஈடுபடும் அயனி வழிமுறைகள் குறித்த கண்டுபிடிப்புகளுக்காக’ 1963-ஆம் ஆண்டு உடலியல் அல்லது மருத்துவத்துக்கான நோபல் பரிசை (இணைந்து) பெற்றார்.

• சர் பெர்னார்ட் காட்ஸ் (Sir Bernard Katz) (1911–2003), மருத்துவர் மற்றும் உயிர்-இயற்பியலாளர். ஜெர்மனியில் பிறந்த பெர்னார்ட் காட்ஸ் 1941-இல் ஆஸ்திரேலியக் குடிமகனானார். ‘நரம்பு முனைகளில் உள்ள வேதிச் செய்தித் தூதர்கள் மற்றும் அவற்றின் சேமிப்பு, வெளியீடு, செயலிழப்புக்கான வழிமுறை குறித்த கண்டுபிடிப்புகளுக்காக’ 1970-ஆம் ஆண்டு உடலியல் அல்லது மருத்துவத்துக்கான நோபல் பரிசைப் பெற்றார்.

• பேராசிரியர் ஜான் வார்கப் கார்ன்ஃபோர்த் (John Warcup Cornforth) (1917–2007), வேதியியலாளர். ஜான் கார்ன்ஃபோர்த் சிட்னியில் பிறந்தார்; ‘நொதிகளால் ஊக்குவிக்கப்படும் வினைகளின் ஸ்டீரியோ வேதியியல் குறித்த அவரது பணிக்காக’ 1975-ஆம் ஆண்டு வேதியியலுக்கான நோபல் பரிசை (இணைந்து) பெற்றார்.

• பேராசிரியர் பீட்டர் டோஹெர்ட்டி (Peter Doherty) (பிறப்பு 1940), நோய் எதிர்ப்பியல் நிபுணர். பீட்டர் டோஹெர்ட்டி குயின்ஸ்லாந்தில் பிறந்தார்; ‘உயிரணு சார்ந்த நோய் எதிர்ப்புப் பாதுகாப்பின் தனித்தன்மை குறித்த கண்டுபிடிப்புகளுக்காக’ 1996-ஆம் ஆண்டு உடலியல் அல்லது மருத்துவத்துக்கான நோபல் பரிசை (இணைந்து) பெற்றார்.

• பேராசிரியர் பாரி மார்ஷல் (Barry Marshall) (பிறப்பு 1951), இரைப்பை-குடலியல் நிபுணர், மற்றும் டாக்டர் ராபின் வாரன் (Robin Warren) (பிறப்பு 1937), நோயியல் நிபுணர். ‘ஹெலிகோபாக்டர் பைலோரி (Helicobacter pylori) பாக்டீரியா மற்றும் இரைப்பை அழற்சி, குடல் புண் நோயில் அதன் பங்கு’ பற்றிய கண்டுபிடிப்புக்காக பாரி மார்ஷலும் ராபின் வாரனும் 2005-ஆம் ஆண்டு உடலியல் அல்லது மருத்துவத்துக்கான நோபல் பரிசை இணைந்து வென்றனர்.

• பேராசிரியர் எலிசபெத் ஹெலன் பிளாக்பர்ன் (Elizabeth Helen Blackburn) (பிறப்பு 1948), உயிரியலாளர். எலிசபெத் பிளாக்பர்ன் ஹோபார்ட்டில் பிறந்தார்; ‘குரோமோசோம்கள் டெலோமியர்கள் மற்றும் டெலோமரேஸ் நொதியால் எவ்வாறு பாதுகாக்கப்படுகின்றன என்பதைக் கண்டுபிடித்ததற்காக’ 2009-ஆம் ஆண்டு உடலியல் அல்லது மருத்துவத்துக்கான நோபல் பரிசை (இணைந்து) பெற்றார்.

• பேராசிரியர் பிரையன் பி. ஷ்மிட் (Brian P. Schmidt) (பிறப்பு 1967), வானியலாளர். ‘தொலைவிலுள்ள மீநிலைவெடிப்புகளின் அவதானிப்புகள் மூலம் பிரபஞ்சத்தின் விரிவாக்கம் முடுக்கமடைவதைக் கண்டுபிடித்ததற்காக’ பிரையன் பி. ஷ்மிட் 2011-ஆம் ஆண்டு இயற்பியலுக்கான நோபல் பரிசை (இணைந்து) பெற்றார்.

கீழ்க்கண்ட ஆஸ்திரேலியர் இலக்கியத்துக்கான நோபல் பரிசைப் பெற்றுள்ளார்.

• பேட்ரிக் ஒயிட் (Patrick White) (1912–90), நாவலாசிரியர் மற்றும் நாடக ஆசிரியர். ஆஸ்திரேலியப் பெற்றோருக்கு லண்டனில் பிறந்த பேட்ரிக் ஒயிட், ‘இலக்கியத்துக்குள் ஒரு புதிய கண்டத்தை அறிமுகப்படுத்திய காவிய மற்றும் உளவியல் கதைசொல்லல் கலைக்காக’ 1973-இல் இலக்கியத்துக்கான நோபல் பரிசைப் பெற்றார்.