Ikalawang Digmaang Pandaigdig (1939–45)

Sa Ikalawang Digmaang Pandaigdig, lumaban ang mga Australiano kasama ang mga Allied laban sa Alemanya sa Europa, sa Mediteraneo at sa Hilagang Africa. Lumaban din sila laban sa Japan sa Timog-Silangang Asya at sa Pasipiko.

Sa mga disyerto ng Hilagang Aprika, nilabanan ng mga tropang Australyano ang mahabang pagkubkob ng mga Aleman at Italyano sa bayan ng Tobruk, ang huling depensa laban sa pagsulong ng mga Aleman patungong Ehipto. Sa loob ng walong mahabang buwan, tiniis ng mga lalaking ito (karamihan ay mga Australyano) ang mabangis na pag-atake at mahihirap na kalagayan, na nakatira sa mga yungib at bitak ng lupa. Ang kanilang determinasyon, katapangan at katatawanan, kasama ang agresibong taktika ng kanilang mga kumander, ay naging pinagkukunan ng inspirasyon sa ilan sa pinakamadilim na araw ng digmaan. Sa ganitong paraan, nakamit nila ang pangmatagalang katanyagan bilang ang 'Rats of Tobruk' (Mga Daga ng Tobruk).

Noong 1941, sinimulan ng Japan ang digmaan nito sa Pasipiko. Ang mga Australyanong kawal, lalaki at babae, ay pumunta upang ipagtanggol ang Papua New Guinea. Ang gawaing ito ay ibinigay sa mga regular na sundalo at mga batang sapilitang nakalistang sundalo na kulang sa pagsasanay. Nakipaglaban sila sa kaaway sa gubat, sa isang matarik at maputik na landas na kilala bilang Kokoda Track. Napigilan ng mga tropang Australyano ang pagsulong ng mga Hapon. Tulad ng Anzac Cove sa Gallipoli, ang Kokoda Track ay naging lugar ng peregrinasyon para sa ilang Australyano.

Noong 1942, sinakop ng mga Hapon ang base ng Britanya sa Singapore. Humigit-kumulang 15,000 tropang Australyano ang kabilang sa mga nabihag at dinala upang magtrabaho sa Thai-Burma Railway. Sa panahon ng pagtatayo nito, maraming tropang Australyano ang dumanas ng malupit na pagtrato mula sa mga Hapon. Bagaman ginawa ng mga Australyanong bilanggo ng digmaan ang lahat ng kanilang makakaya upang mag-alagaan sa isa't isa, dito namatay ang mahigit 2700 Australyanong bilanggo ng digmaan.

Sir Edward 'Weary' Dunlop (1907–93)

Si Sir Edward 'Weary' Dunlop ay isang matapang at mapagmalasakit na siruhano at isang bayani ng digmaan ng Australia. Noong Ikalawang Digmaang Pandaigdig ay nabihag siya ng mga Hapon at dinala sa Burma upang magtrabaho sa Thai-Burma Railway. Napakabigat ng trabahong ito.

Bilang kumander, ipinagtanggol ni Weary ang kanyang mga tauhan, at bilang kanilang siruhano, gumugol siya ng mahabang oras sa panggagamot sa kanila. Pinahirapan siya sa kampo ngunit patuloy pa rin siyang naglingkod nang buong tapang.

Noong 1969, ginawaran siya ng pagka-kabalyero dahil sa kanyang ambag sa medisina. Nang siya ay mamatay, mahigit 10,000 katao ang pumila sa mga lansangan ng Melbourne para sa libing ng estado ng bayaning tinawag nilang 'The Surgeon of the Railway' (Ang Siruhano ng Riles).

Iba pang mga labanan Di-nagtagal pagkatapos ng Ikalawang Digmaang Pandaigdig, mula 1950 hanggang 1953, ipinadala ang mga sandatahang lakas ng Australia bilang bahagi ng isang multinasyonal na puwersa ng United Nations upang ipagtanggol ang South Korea laban sa mga komunistang puwersa ng hilaga.

Di-nagtagal pagkatapos noon, sumama ang Australia sa United States of America sa pagsuporta sa pamahalaan ng South Vietnam laban sa mga komunistang puwersa ng Vietnam na naghahangad na pag-isahin muli ang bansa. Ang Digmaang Vietnam ang nananatiling pinakamalaking pagtatalaga ng sandatahang lakas ng Australia mula noong Ikalawang Digmaang Pandaigdig. Tumagal mula 1962 hanggang 1973, ito rin, sa panahong iyon, ang pinakamahabang digmaan kung saan lumaban ang Australia. Kontrobersyal ang paglahok na ito, at maraming Australyano ang lumabas sa lansangan upang ipakita ang kanilang pagtutol sa layunin at, lalo na, sa sapilitang paglilista ng mga batang lalaking Australyano sa digmaan.

Ang Australian Defence Force ay nasangkot din sa mga labanan sa East Timor, Iraq, Sudan at Afghanistan at lumahok sa mga operasyong pangkapayapaan ng United Nations sa maraming bahagi ng mundo, kabilang ang Aprika, Gitnang Silangan at ang rehiyon ng Asia-Pacific.

Remembrance Day Bukod sa Anzac Day, ginugunita ng mga Australyano ang mga naglingkod at namatay sa digmaan tuwing Remembrance Day. Sa ganap na 11am ng 11 November (ang ika-11 buwan) bawat taon, humihinto ang mga Australyano upang alalahanin ang sakripisyo ng mga lalaki at babaeng namatay o nagdusa sa mga digmaan at labanan, gayundin ang lahat ng naglingkod. Nagsusuot kami ng pulang poppy sa araw na ito.