Ang Great Depression (1929–32)

Ang Great Depression ay isang panahon ng matinding kahirapan para sa mga mamamayan ng Australia. Nagsimula ito kasabay ng pagbagsak ng New York Stock Exchange noong Oktubre 1929. Kabilang sa ibang mga salik na nag-ambag sa Depression sa Australia ang pagbagsak ng presyo ng mga kalakal ng Australia at ang kaguluhan sa industriya habang binabawasan ng mga employer ang trabaho at sahod. Sa kalagitnaan ng 1932, halos 32 porsyento ng mga Australiano ang walang trabaho.

Nakapipinsala ang epekto ng Depression sa lipunang Australiano. Dahil walang trabaho at matatag na kita, maraming tao ang nawalan ng tahanan. Napilitan silang manirahan sa mga pansamantalang silungan na walang pampainit o sanitasyon. May mga amang iniwan ang kanilang pamilya o bumaling sa alak. Maraming batang mula sa uring manggagawa ang tumigil sa pag-aaral sa edad na 13 o 14. Maraming kababaihan ang nagtrabaho sa payak na hanapbuhay habang inaalagaan nang mag-isa ang kanilang mga anak at tahanan.

Sa panahon bago ang Depression, walang sentral na programa ang pamahalaan para sa kawalan ng trabaho. Bukod sa mga kawanggawa at ilang pribadong organisasyon, kinailangang umasa ng mahihirap sa mga proyektong pampubliko at pantrabaho. Nagsimulang bumuti ang ekonomiya noong 1932, ngunit sa maraming pagkakataon, hindi na naayos ang pinsala sa mga pamilya.

Sa panahon ng Great Depression, nabigyang-diin ang mahalagang papel ng mga kawanggawa at boluntaryo sa Australia.

Sir Charles Kingsford Smith (1897–1935)

Si Sir Charles Kingsford Smith ay isang maagang piloto ng Australia. Sa Unang Digmaang Pandaigdig, lumaban siya sa Gallipoli at lumipad kasama ang Royal Flying Corps ng Britanya.

Ang kanyang pinakadakilang tagumpay ay ang paggawa ng unang pagtawid sa Karagatang Pasipiko mula California hanggang Queensland noong 1928. Ang kanyang eroplano, ang Southern Cross, ay dumating sa Australia sa harap ng 25,000 humahangang tao na nagsisigawan para sa kanilang bayaning si ‘Smithy’. Noong 1932, ginawaran siya ng pagkakabalyero dahil sa kanyang serbisyo sa abyasyon.

Noong 1935, trahikong bumagsak siya kasama ang kanyang eroplano sa isang paglipad mula England patungong Australia at hindi na natagpuan.

Si Sir Charles Kingsford Smith ay tinawag na pinakadakilang piloto sa mundo at naaalala siya dahil sa pagbibigay sa mga tao, sa gitna ng Depression, ng isang tunay na bayaning Australiano na maaaring tingalain.