Ang alamat ng Anzac

Ang tradisyong Anzac ay nahubog sa Gallipoli Peninsula sa Türkiye.

Ang paglapag sa Gallipoli noong 25 Abril 1915 ang nagpasimula ng isang kampanyang tumagal ng walong buwan at nagresulta sa mahigit 26,000 nasawi at nasugatang Australiano, kabilang ang mahigit 8000 na napatay o namatay dahil sa sakit. Ang tapang at diwa ng mga naglingkod sa Gallipoli Peninsula ay humubog ng isang alamat, at ang katagang ‘Anzac’ ay naging bahagi ng wika ng Australia at New Zealand.

Noong 25 Abril 1916, ipinagdiwang ng Australia, New Zealand, England at ng mga tropa sa Egypt ang unang anibersaryo ng paglapag na ito. Mula noon, ang 25 Abril ay kilala na bilang Anzac Day.

Noong dekada 1920, ginanap na ang mga seremonya ng Anzac Day sa buong Australia at itinalaga ng mga estado ang Anzac Day bilang pampublikong pista opisyal. Itinayo ang malalaking monumento ng digmaan sa mga kabiserang lungsod, at ang mga monumento sa mga lungsod at bayan sa buong bansa ay pagpupugay sa mga kabataang lalaki at babaeng napatay sa digmaang iyon at sa mga sumunod na labanan.

Ang Anzac Day ay isang araw upang parangalan ang lahat ng naglingkod sa mga digmaan, alitan at operasyon ng pagpapanatili ng kapayapaan, at ang kanilang mateship, tatag sa harap ng kahirapan at mga sakripisyong ginawa para sa aming kinabukasan. Isa rin itong araw ng pagninilay sa maraming ibang kahulugan ng digmaan.

Ngayon, ipinagdiriwang ang Anzac Day sa Australia at sa buong mundo. Ang mga nakabalik na sundalong lalaki at babae ng Australia, mga tagapagpanatili ng kapayapaan at mga beterano mula sa ibang bansa ay nagmamartsa nang buong dangal sa mga parada ng Anzac Day.