Unang Digmaang Pandaigdig (1914–18)

Bukod sa alitan sa pagitan ng mga settler at ng mga Aboriginal na mamamayan, kapansin-pansing mapayapa ang kasaysayan ng Australia. Walang naganap na digmaang sibil o rebolusyon.

Ang mga henerasyon ng mga Australiano ay nanatiling lubos na tapat sa Imperyong Britaniko.

Bilang isang Europeong himpilan na malapit sa Asya, sa kasaysayan ay naramdaman ng Australia na mahina ito, lalo na nang maging malakas na kapangyarihan ang Japan. Umasa kami sa Imperyong Britaniko at sa lakas ng hukbong-dagat nito upang ipagtanggol ang Australia. Lumaban ang Australia sa parehong digmaang pandaigdig upang manatiling malakas ang Imperyong Britaniko at upang maprotektahan ang Australia.

Sumali ang Australia sa Unang Digmaang Pandaigdig noong Agosto 1914, at noong 1915 ay lumahok sa isang pagsalakay laban sa kaalyado ng Alemanya, ang Türkiye. Ang mga lalaki ng Australian and New Zealand Army Corps (Anzacs) ay binigyan ng sarili nilang bahagi ng Gallipoli Peninsula na sasalakayin.

Kinailangan nilang umakyat sa matatarik na bangin habang binabaril sila ng mga tropang Turko. Sa paanuman, nakaakyat sila sa mga bangin at naghukay ng kanlungan, bagaman maraming kabataang lalaki ang namatay. Labis na ipinagmalaki ng mga Australiano sa bansa ang diwa ng mga Anzac.

Pagkatapos ng Gallipoli, lumaban ang mga puwersang Australiano sa Western Front sa France at Belgium. Dito nila nakuha ang pangalang ‘diggers’ dahil napakaraming oras nilang ginugol sa paghuhukay at pagkukumpuni ng mga trintsera. Sa pamumuno ng kanilang kumander na si Lieutenant General Sir John Monash, nagtamo ang mga digger ng Australia ng malalaking tagumpay sa huling mga labanan laban sa Alemanya at nakamit ang walang-hanggang pasasalamat ng mga Pranses na kanilang tinutulungan.

Naglingkod din ang mga sundalong lalaki at babae ng Australia sa Gitnang Silangan, na lumahok sa pagtatanggol sa Suez Canal, at sa pagsakop ng mga Allied sa Sinai Peninsula at Palestine.

Si Simpson at ang kanyang asno— John Simpson Kirkpatrick (1892–1915)

Naglingkod si Private John Simpson sa Gallipoli sa medikal na kuwerpo ng ambulansya bilang tagabuhat ng stretcher. Mahirap magbuhat ng stretcher sa mga burol at lambak. Salungat sa utos ng hukbo, gumamit siya ng isang asno na tinawag niyang Duffy upang tulungang ibalik sa ligtas na lugar ang mga sugatang sundalo.

Araw at gabi, oras-oras, isinusugal ni Simpson at ng kanyang asno ang kanilang buhay sa paglalakbay sa pagitan ng labanan at ng kampo sa dalampasigan.

Dumating si Private John Simpson sa Gallipoli noong 25 Abril 1915. Napatay siya makalipas lamang ang apat na linggo ng mga machine gun ng kaaway. Tahimik na nanood nang may lungkot ang mga sundalo sa kampo sa dalampasigan habang si Duffy, na may dalang sugatang sundalo pa rin, ay tumatakbo patungo sa dalampasigan nang wala sa tabi niya ang kanyang batang amo. Si John Simpson Kirkpatrick ay isang alamat ng Australia.