Ang gold rush

Ang pagkatuklas ng ginto sa New South Wales noong unang bahagi ng 1851 ay tinawag na ‘pagkatuklas na nagbago sa isang bansa’. Di-nagtagal, natagpuan din ang ginto sa bagong-malayang kolonya ng Victoria.

Sa pagtatapos ng 1852, mga 90,000 katao na ang naglakbay patungong Victoria mula sa lahat ng bahagi ng Australia at ng buong mundo upang maghanap ng ginto.

Ang paghihimagsik sa Eureka ay naaalala bilang isang dakilang demokratikong sandali sa kasaysayan ng Australia. Napakabagsik minsan ng mga tropa ng pamahalaan sa mga maghuhukay ng ginto kapag naniningil ng bayad sa lisensya para maghukay ng ginto. Noong 11 Nobyembre 1854, mga 10,000 katao ang nagtipon sa Bakery Hill, Ballarat, upang tanggapin ang isang kartang naglalaman ng mga batayang demokratikong karapatan, kabilang ang pag-aalis ng mamahaling lisensya sa ginto, at ang kakayahang bumoto ng mga kinatawan sa Parlamento ng Victoria.

Kasunod nito, itinayo ang ‘Eureka Stockade’ sa mga hukayan ng Eureka. Dito sumumpa ang mga maghuhukay sa ilalim ng isang bandila ng himagsikan (na may Southern Cross) na magtutulungan sila at lalaban upang ipagtanggol ang kanilang mga karapatan at kalayaan. Sa umaga ng 3 Disyembre 1854, nagpadala ng mga sundalo ang mga opisyal ng pamahalaan upang salakayin ang stockade. Pagkatapos ng maikling labanan, nadaig ang mga maghuhukay ng ginto at mga 30 ang napatay.

Nilitis ang mga pinuno ng himagsikan sa kasong mataas na pagtataksil, ngunit walang hurado ang nagnais silang hatulan. Natuklasan ng isang Royal Commission na nagkamali ang pamahalaan at maraming hinihingi ng mga minero ang natugunan, kabilang ang kanilang nais na kinatawan sa pulitika. Sa loob ng isang taon, naging miyembro ng Parlamento ng Victoria si Peter Lalor, ang pinuno ng mga naghimagsik.

Sa paglipas ng mga taon, ang paghihimagsik sa Eureka ay naging simbolo ng pagtutol at ng paniniwala sa ‘a fair go’ (patas na pagkakataon).

Binago ng gold rush ang Australia sa maraming paraan. Sa mga taon ng gold rush, tumaas ang populasyon ng Australia na hindi Katutubo mula sa mga 430,000 noong 1851 hanggang 1.7 milyon noong 1871. Ang mga unang riles at telegrapo ay itinayo noong dekada 1850 upang pag-ugnayin ang lumalaking populasyon.

Natagpuan ang malalaking deposito ng ginto sa lahat ng kolonya maliban sa South Australia. Umuunlad ang ekonomiya at nalampasan ng ginto ang lana bilang pinakamahalagang eksport ng Australia. Noong mga 1890, isa na ang Australia sa may pinakamataas na antas ng pamumuhay sa mundo.