Ang sining

May masiglang eksena sa sining ang Australia na kinabibilangan ng mga tradisyong pangkultura ng mga Aboriginal at Torres Strait Islander ng bansa. Ang mga Australyanong biswal at performing artist, kabilang sa pelikula, sining, teatro, musika at sayaw, ay malawak na kinikilala kapwa sa Australia at sa ibang bansa.

Panitikan May matibay na tradisyon ang Australia sa panitikan. Nagsimula ito sa pagkukuwento ng mga Aboriginal at Torres Strait Islander at nagpatuloy sa mga pasalitang kuwento ng mga bilanggong dumating noong huling bahagi ng ika-18 siglo.

Karamihan sa maagang panulat ng Australia ay tungkol sa bush at sa mga hirap ng buhay sa gayong malupit na kapaligiran. Ang mga manunulat tulad nina Henry Lawson at Miles Franklin ay sumulat ng mga tula at kuwento tungkol sa bush at sa pamumuhay ng mga Australyano.

Isang Australyanong nobelista, si Patrick White, ang tumanggap ng Nobel Prize sa Panitikan noong 1973. Kabilang sa iba pang sikat na Australyanong may-akda sina Peter Carey, Colleen McCullough, Sally Morgan, Tim Winton, Tom Keneally at Bryce Courtenay.

Judith Wright (1915–2000)

Si Judith Wright ay isang natatanging makata, konserbasyonista at tagapagtanggol ng mga karapatan ng mga Aboriginal. Ipinahayag niya ang kanyang pagmamahal sa Australia at sa mga tao nito sa pamamagitan ng kanyang mga tula. Marami siyang natanggap na parangal, kabilang ang Encyclopaedia Britannica Prize para sa panitikan at ang Queen's Gold Medal for Poetry. Kasapi rin siya ng Australian Conservation Committee at ng Aboriginal Treaty Committee.

Naaalala si Judith Wright dahil sa kanyang husay bilang makata at sa pagsulong ng panitikang Australyano at ng repormang panlipunan at pangkapaligiran.

Teatro at pelikula Ang mga Australyanong dula, pelikula at gumagawa ng pelikula ay kinikilala sa Australia at sa ibang bansa. Ang mga Australyanong artista tulad nina Cate Blanchett, Geoffrey Rush, Nicole Kidman at Hugh Jackman at ang mga gumagawa ng pelikula tulad nina Peter Weir at Baz Luhrmann ay nanalo ng maraming pandaigdigang parangal dahil sa kanilang kahusayan sa pelikula.

Biswal na sining Ang pinakakilalang mga Australyanong akda ng biswal na sining ay ang makasagisag na mga pintura ng mga Katutubo at ang mga eksena ng bush noong ika-19 na siglo ng mga pintor tulad nina Tom Roberts, Frederick McCubbin at Arthur Streeton. Noong kalagitnaan ng ika-20 siglo, inilarawan ng mga pintor na sina Russell Drysdale at Sidney Nolan ang kalupitan ng outback sa matatapang na kulay. Kamakailan lamang, nakamit ni Brett Whiteley ang pandaigdigang pagkilala dahil sa kanyang natatangi at makulay na estilo. Ang sining ng mga Katutubo, kabilang ang kina Albert Namatjira, Emily Kame Kngwarreye, Gloria Petyarre, Rover Thomas at Clifford Possum Tjapaltjarri, ay lalong hinahanap sa Australia at sa ibang bansa.

Musika at sayaw Ang pinakamabilis makilalang tunog ng musikang Australyano ay ang didgeridoo, ang sinaunang instrumento ng mga Katutubo.

Tinanggap at nagtagumpay ang mga Australyano sa lahat ng larangan ng musika at kinikilala sila sa buong mundo dahil sa kanilang mga ambag sa klasikal, country at rock na musika.

Kabilang sa kilalang mga Australyanong musikero sina Kylie Minogue, Jimmy Barnes, Paul Kelly, Olivia Newton-John, John Farnham, Nick Cave, at ang mga Katutubong artista na sina Archie Roach, Gurrumul at Jessica Mauboy. Ang mga Australyanong banda tulad ng AC/DC at INXS ay nagkaroon ng mga tagahanga sa buong mundo.

Umunlad ang sayaw sa Australia dahil sa pagsisikap ng mga dakilang mananayaw at koreograpo tulad nina Sir Robert Helpmann, Meryl Tankard, Stephen Page, at Li Cunxin. Ang Bangarra ay isang kompanya ng sayaw ng mga Aboriginal at Torres Strait Islander, na malawak na kinikilala sa bansa at sa buong mundo dahil sa natatangi nitong estilo sa sayaw, tunog, musika at disenyo.