Tagumpay at imbensiyon sa agham

May matibay na talaan ang mga Australyano ng mga tagumpay na pang-agham sa larangan ng medisina, teknolohiya, agrikultura, pagmimina at pagmamanupaktura.

Ilang Australyano ang ginawaran ng Nobel Prize para sa mga pagtuklas sa agham at medisina.

Ang mga nagtagumpay sa agham ay tumanggap din ng Australian of the Year Awards. Noong 2005, napunta ang parangal kay Propesor Fiona Wood, na bumuo ng spray-on na balat para sa mga biktima ng paso. Noong 2006, napunta ang parangal kay Propesor Ian Frazer, na bumuo ng bakuna laban sa kanser sa cervix. Noong 2007, si Propesor Tim Flannery, isang nangungunang siyentipiko sa kapaligiran, ang tumanggap ng parangal.

Sina Propesor Wood at Propesor Frazer ay parehong lumipat sa Australia mula sa Britanya. Ang kapwa-imbentor ni Propesor Frazer ay ang yumaong si Dr Jian Zhou, na lumipat mula sa Tsina at naging mamamayang Australyano rin.

Dr Fiona Wood AM (isinilang noong 1958)

Si Dr Wood ay isa sa pinaka-makabago at iginagalang na siruhano at mananaliksik ng Australia. Bilang isang lubos na bihasang plastic at reconstructive surgeon at nangungunang espesyalista sa paso sa mundo, nanguna siya sa pananaliksik at pagbuo ng teknolohiya sa medisina para sa paso.

Kasunod ng kanyang gawain kasama ang mga biktima ng pambobomba sa Bali noong 2002, hinirang si Dr Wood bilang Member of the Order of Australia noong 2003. Kinilala ang kanyang ambag sa pangangalaga sa paso nang siya ay hirangin bilang Australian of the Year noong 2005.

Propesor Fred Hollows (1929–1993)

Si Propesor Fred Hollows ay isang masugid na ophthalmologist (doktor sa mata) na tumulong ibalik ang paningin ng mahigit isang milyong tao sa Australia at sa mga umuunlad na bansa. Isinilang si Fred Hollows sa New Zealand. Noong 1965, lumipat siya sa Australia at kalaunan ay naging pinuno ng departamento ng mata sa isang ospital sa Sydney.

Matibay ang kanyang paniniwala sa pagkakapantay-pantay ng lahat ng tao at tumulong siyang itatag ang unang Aboriginal Medical Service, na marami na ngayon sa buong Australia.

Pagsapit ng 1980, naglalakbay na si Fred Hollows sa buong mundo upang tumulong magtatag ng mga programa sa kalusugan ng mata sa mga umuunlad na bansa. Noong Abril 1989, naging mamamayang Australyano siya.

Nagpapatuloy ang mabuting gawain ni Propesor Hollows sa pamamagitan ng The Fred Hollows Foundation.