ஸ்நோயி மலைத் தொடர் நீர்-மின் திட்டம் (The Snowy Mountains Hydro-Electric Scheme)

1949 இல், கிழக்கு விக்டோரியாவில் ஸ்னோவி ஆற்றின் (Snowy River) நீர் கடலுக்குச் செல்வதற்கு முன் அதைத் தேக்கிப் பிடிக்கும் ஒரு துணிச்சலான திட்டத்தை அரசாங்கம் தொடங்கியது. இந்த நீர் பாசனத்திற்காக உள்நாட்டை நோக்கிப் பாயவும், மின்சாரம் தயாரிக்கப் பயன்படுத்தவும் திருப்பிவிடப்பட்டது. இது முடிக்க 25 ஆண்டுகள் எடுத்த மாபெரும் திட்டமாகும்.

இது ஆஸ்திரேலியாவின் மிகப் பெரிய பொறியியல் திட்டமாகும். உலகின் மிகப் பெரிய நீர்மின் திட்டங்களில் ஒன்றாகவும் இது உள்ளது; உலகின் நவீன குடிசார் பொறியியல் அற்புதங்களில் ஒன்றாக அங்கீகரிக்கப்பட்டுள்ளது.

ஸ்னோவி மவுண்டன்ஸ் திட்டம் (Snowy Mountains Scheme) நியூ சவுத் வேல்ஸில் உள்ள கொஸ்கியூஸ்கோ தேசியப் பூங்காவில் (Kosciusko National Park) அமைந்துள்ளது. இதில் 16 பெரிய அணைகள், ஏழு மின் நிலையங்கள், ஒரு நீரிறைப்பு நிலையம் மற்றும் 225 கிலோமீட்டர் நீளமான சுரங்கங்கள், குழாய்ப் பாதைகள் மற்றும் நீர்ப்பாதைகள் உள்ளன. இதில் பெரும்பகுதி நிலத்தடியில் உள்ளது. உள்நாட்டு நியூ சவுத் வேல்ஸ் மற்றும் விக்டோரியாவின் பண்ணைகளுக்கு இந்தத் திட்டம் இன்றியமையாத நீரை வழங்குகிறது. அதன் மின் நிலையங்கள் நியூ சவுத் வேல்ஸின் மின்சாரத்தில் 10 சதவீதம் வரையிலும் உற்பத்தி செய்கின்றன.

இத்திட்டத்தின் பணி 1949 இல் தொடங்கி 1974 இல் முடிந்தது. 30க்கும் மேற்பட்ட நாடுகளைச் சேர்ந்த 100,000க்கும் மேற்பட்டோர் இத்திட்டத்தில் பணியாற்றினர். இந்தத் தொழிலாளர்களில் எழுபது சதவீதம் பேர் குடிபெயர்ந்தவர்கள். திட்டம் முடிந்த பிறகு, ஐரோப்பியத் தொழிலாளர்களில் பெரும்பாலோர் ஆஸ்திரேலியாவிலேயே தங்கி, ஆஸ்திரேலியாவின் பன்முகப் பண்பாட்டுச் சமூகத்திற்குத் தமது மதிப்புமிக்க பங்களிப்பைத் தொடர்ந்தனர்.

சுதந்திரமான, பன்முகப் பண்பாடு கொண்ட, வளமிக்க நாடு என்ற ஆஸ்திரேலியாவின் அடையாளத்தின் முக்கியமான சின்னமாக ஸ்னோவி மவுண்டன்ஸ் திட்டம் விளங்குகிறது.