பன்முகப் பண்பாட்டுக் குடிபெயர்வு

1950கள் மற்றும் 1960களில், பல ஆசிய, தேவாலய மற்றும் பிற குழுக்கள் அடங்கிய வளர்ந்துவரும் ஒரு இயக்கம் 'வெள்ளை ஆஸ்திரேலியா' ('White Australia') கொள்கையை முடிவுக்குக் கொண்டுவரப் பாடுபட்டது.

1958 இல், அரசாங்கம் சொல்வதெழுதும் தேர்வை (dictation test) நீக்கியது; 1966 இல், தேர்ந்தெடுக்கப்பட்ட ஐரோப்பியர் அல்லாதோர் மற்றும் திறமையான ஆசியர்களின் குடிபெயர்வை ஆஸ்திரேலியா தொடங்கியது. இறுதியில், ஆஸ்திரேலியாவின் குடிபெயர்வுத் திட்டத்தில் அனைத்து நாடுகளையும் உள்ளடக்குவதன் மதிப்பை எங்கும் உள்ள ஆஸ்திரேலியர்கள் உணர்ந்தனர்.

1973 இல், 'வெள்ளை ஆஸ்திரேலியா' கொள்கை முடிவுக்கு வந்தது; ஆஸ்திரேலியா பன்முகப் பண்பாட்டை நோக்கிய பாதையில் சென்றது. இக்காலத்திலிருந்து, குடிபெயர்வுக்கான அனைத்து இன அடிப்படையிலான விதிமுறைகளையும் அரசாங்கம் நீக்கியது. 1975 இல், வியட்நாம் போருக்குப் பிறகு, சாதனை அளவிலான ஆசிய அகதிகளையும் குடிபெயர்வோரையும் ஆஸ்திரேலியா ஏற்றுக்கொண்டது; அவர்களில் பெரும்பாலோர் வியட்நாம், சீனா மற்றும் இந்தியாவிலிருந்து வந்தவர்கள்.

1945 முதல், மில்லியன் கணக்கான மக்கள் ஆஸ்திரேலியாவில் வாழ வந்துள்ளனர்; அவர்களில் போரால் சிதைந்த நாடுகளிலிருந்து வந்த பல அகதிகளும் அடங்குவர். இன்று, ஆஸ்திரேலியாவின் குடிபெயர்வோர் உலகின் அனைத்துப் பகுதிகளிலிருந்தும் வருகின்றனர்.

ஒவ்வொரு இனம், இனக்குழு அல்லது பண்பாட்டைச் சேர்ந்த ஒவ்வொருவரும் நமது சமூகத்தின் ஒரு பகுதியாக உணரக்கூடிய வகையில் ஆஸ்திரேலியா ஒரு செயலூக்கமான உள்ளடக்கல் கொள்கையைக் கொண்டுள்ளது. இக்கொள்கை அரசாங்கக் கொள்கைகள் உட்பட ஆஸ்திரேலியச் சமூகத்தின் அனைத்துப் பரிமாணங்களிலும் ஊடுருவி உள்ளது. இளம் பருவக் கல்வி முதல் பல்கலைக்கழகம் வரையிலான நமது கல்வித் திட்டத்தில் இது பிரதிபலிக்கிறது; ஒவ்வொரு பணியிடத்திலும் கடைப்பிடிக்கப்படுகிறது.

ஒவ்வொரு தனிநபரும் சமமாகவும் பாகுபாடின்றியும் நடத்தப்பட வேண்டிய உரிமையை ஆஸ்திரேலிய மனித உரிமைகள் ஆணையமும் (Australian Human Rights Commission) ஒவ்வொரு மாநிலம் மற்றும் பிரதேசத்திலும் உள்ள அரசாங்கப் பாகுபாடு எதிர்ப்பு அமைப்புகளும் பாதுகாக்கின்றன. இனப் பாகுபாடு பகிரங்கமாகக் கண்டிக்கப்படுகிறது; சட்டத்தின்படி அது ஒரு குற்றமாகும்.

ஆஸ்திரேலியா நல்லிணக்கமும் ஏற்புத்தன்மையும் கொண்ட ஒரு பன்முகப் பண்பாட்டுச் சமூகமாக மாறியுள்ளது. குடிபெயர்ந்தவர்கள், பூர்வகுடி ஆஸ்திரேலியர்கள் மற்றும் ஆஸ்திரேலியாவில் பிறந்த அனைவரும் தமது இலக்குகளை அமைதியாகத் தொடர சுதந்திரமாக உணரக்கூடிய நாடு இது.

டாக்டர் விக்டர் சாங் (Dr Victor Chang) (1936–91)

டாக்டர் விக்டர் சாங் ஆஸ்திரேலியாவின் சிறந்த இதய அறுவை சிகிச்சை நிபுணர்களில் ஒருவர். விக்டர் பீட்டர் சாங் யாம் ஹிம் (Victor Peter Chang Yam Him) 1936 இல் சீனாவில் பிறந்தார்; தனது 15 வயதில் ஆஸ்திரேலியாவுக்கு வந்தார்.

அவர் சிட்னியில் உள்ள செயின்ட் வின்சென்ட்ஸ் மருத்துவமனையில் (St Vincent's Hospital) பணியாற்றினார்; 1984 இல் இதய மாற்று அறுவை சிகிச்சையில் சிறப்புப் பெற்ற ஆஸ்திரேலியாவின் முதல் மையத்தை அவர் நிறுவினார். 1986 இல், விக்டருக்கு ஆஸ்திரேலிய விருதுப் பேரவையின் தோழர் (Companion of the Order of Australia) என்ற கௌரவம் வழங்கப்பட்டது.

உறுப்பு தானம் செய்வோரின் பற்றாக்குறை குறித்து விக்டர் கவலை கொண்டார்; எனவே அவர் ஒரு செயற்கை இதயத்தை வடிவமைக்கத் தொடங்கினார். 1991 இல் அவர் சோகமாகக் கொல்லப்பட்டபோது அது கிட்டத்தட்ட முடிவடையும் நிலையில் இருந்தது.

அவரது நினைவாக ஒரு புதிய ஆய்வு மையம் நிறுவப்பட்டுள்ளது. அவரது நிபுணத்துவம், நம்பிக்கை மற்றும் புத்தாக்கத்திற்காக அவர் நினைவுகூரப்படுகிறார்.