1900களின் தொடக்கத்தில் குடிபெயர்வு

முதலாம் மற்றும் இரண்டாம் உலகப் போர்களுக்கு இடைப்பட்ட காலத்தில், ஆஸ்திரேலியாவுக்குள் நுழைவதற்கான கட்டுப்பாடான நிபந்தனைகள் தொடர்ந்தன. இருப்பினும், தென் ஐரோப்பாவிலிருந்து, குறிப்பாக ஆண்களின், குடிபெயர்வு அதிகரித்தது. அவர்கள் பல திறன்களையும், கல்வியையும், தமது சொந்தப் பண்பாட்டு விழுமியங்களையும் உடன் கொண்டு வந்தனர். ஆஸ்திரேலியாவின் கிராமப்புறத் தொழில்களை வளர்க்க அவர்கள் உதவினர்; சாலைகளையும் ரயில்பாதைகளையும் கட்டினர். திறமையான இத்தாலியக் கல்தச்சர்கள் பொதுக் கட்டிடங்கள் மற்றும் குடியிருப்புகளின் கட்டுமானத்தில் குறிப்பிடத்தக்க பங்களிப்பை வழங்கினர்.

1930களின் இறுதியில், ஐரோப்பாவிலிருந்து யூத அகதிகள் வரத் தொடங்கினர். அவர்கள் நாஜி ஜெர்மனியின் அச்சுறுத்தலிலிருந்து தப்பி வந்தவர்கள். அவர்கள் ஜெர்மனி, ஆஸ்திரியா, செக்கோஸ்லோவாக்கியா, ஹங்கேரி மற்றும் போலந்திலிருந்து வந்தனர். பலர் உயர் கல்வி பெற்றவர்கள்; ஆஸ்திரேலியாவின் பொருளாதாரத்திற்கும் பண்பாட்டு வாழ்விற்கும் அவர்கள் பெரிதும் பங்களித்தனர்.

இரண்டாம் உலகப் போரில் கைது செய்யப்பட்ட சுமார் 18,000 இத்தாலியப் படைவீரர்கள் ஆஸ்திரேலியாவில் போர்க் கைதி முகாம்களில் வைக்கப்பட்டிருந்தனர். அவர்கள் முகாம்களில் குறுகிய காலமே தங்கியிருந்தாலும், அவர்கள் நியாயமாக நடத்தப்பட்டனர்; பலர் இந்த நிலத்தையும் மக்களையும் பற்றி ஏதோ ஒன்றைக் கற்றுக்கொண்டனர். போருக்குப் பிறகு, பலர் குடியேறுபவர்களாக ஆஸ்திரேலியாவுக்குத் திரும்பினர்.