1800களில் குடிபெயர்வு

1800 களின் தொடக்கத்தில், காலனிகளில் இருந்த முக்கியக் குழுக்கள் ஆங்கிலேய, ஸ்காட்டிஷ், வெல்ஷ் மற்றும் ஐரிஷ் மரபைச் சேர்ந்தவை. ஆஸ்திரேலியாவின் பல பொழுதுபோக்குகள், கலாச்சார நடவடிக்கைகள் மற்றும் மதப் பழக்கவழக்கங்கள் பிரிட்டனுடையவற்றைப் பிரதிபலித்தன. ஐரோப்பாவிலிருந்தும் ஆசியாவிலிருந்தும் வந்த சிறு குடியேறிக் குழுக்களும் இருந்தன. 1800 களில் வந்த ஐரோப்பியர்களில் இத்தாலியர்கள், கிரேக்கர்கள், போலந்தியர்கள், மால்டாவினர் மற்றும் ரஷ்யர்கள், மேலும் மது (ஒயின்) தொழிலில் பணியாற்றிய பிரெஞ்சுக் குடியேறிகளும் அடங்குவர். அவர்கள் பெரும்பாலும் வேலையையும் செல்வத்தையும் தேடி வந்த இளைஞர்கள், அல்லது கப்பல்களை விட்டு வெளியேறிய மாலுமிகள்.

1842 க்குப் பிறகு, சீனக் குடியேறிகள் ஆஸ்திரேலியாவுக்கு வரத் தொடங்கினர்; தங்கம் கண்டுபிடிக்கப்பட்ட பிறகு அவர்களின் எண்ணிக்கை அதிகரித்தது. தங்க வயல்களில் இனப் பதற்றங்கள் இருந்தன; 1854 இல் பெண்டிகோவில் (Bendigo) நடந்தவை போன்ற சீனர்களுக்கு எதிரான கலவரங்களுக்கு அவை சில சமயங்களில் வழிவகுத்தன. இந்த இனப் பதற்றங்களின் விளைவாக, 1855 இல் விக்டோரியாவிலும் 1861 இல் நியூ சவுத் வேல்ஸிலும் குடியேற்றத்தின் மீதான முதல் கட்டுப்பாடுகள் வந்தன.

1850 களின் தங்க வேட்டைகளுக்குப் பிறகு, பல சீனர்கள் தாய்நாடு திரும்பினர். தங்கியவர்களில், தண்ணீர் அரிதாக இருந்த பகுதிகளில் மிகவும் தேவைப்பட்ட புதிய பழங்களையும் காய்கறிகளையும் வழங்கிய சந்தைத் தோட்டக்காரர்களும் இருந்தனர்.

1860 களிலிருந்து, ஈரான், எகிப்து மற்றும் துருக்கியிலிருந்து (Türkiye) வந்தவர்கள் ஆஸ்திரேலியாவின் உள்நாட்டுப் பகுதிகளில் ஒட்டகக் 'கூட்டுவரிசை'களை (camel 'trains') இயக்கினர். இந்திய ஒட்டக ஓட்டிகளுடன் சேர்த்து, அவர்கள் ஒரே மாதிரியான உடையாலும் பொதுவான இஸ்லாமிய மதநம்பிக்கைகளாலும் பெருமளவில் 'ஆஃப்கான்கள்' ('Afghans') என்று தளர்வாகக் குறிப்பிடப்பட்டனர். இந்த ஒட்டக ஓட்டிகள் 'உள்நாட்டின் முன்னோடிகள்' என்று கருதப்பட்டனர்.

குயின்ஸ்லாந்தில் (Queensland) சர்க்கரை மற்றும் வாழைத் தொழில்களில் பணியாற்றிய இந்தியர்களும் பசிபிக் தீவினரும் இருந்தனர்; பெரும்பாலும் மிகக் குறைந்த ஊதியத்திற்கும் மோசமான சூழ்நிலைகளிலும் அவர்கள் உழைத்தனர்.

1880 களிலிருந்து, லெபனானிலிருந்து தொழிலாளர்கள் ஆஸ்திரேலியாவுக்கு வந்தனர். அவர்களில் பலர் துணி மற்றும் ஆடைத் தொழில்களில் ஈடுபட்டிருந்தனர்; ஆஸ்திரேலியாவின் நாட்டுப்புறப் பகுதிகளில் இருந்த பெரும்பாலான துணிக்கடைகள் லெபனானியக் குடும்பங்களுக்குச் சொந்தமாயின.