ਜੰਗ ਤੋਂ ਬਾਅਦ ਦੇ ਸ਼ਰਨਾਰਥੀ

ਜੰਗ ਤੋਂ ਬਾਅਦ, ਆਸਟ੍ਰੇਲੀਆ ਨੇ ਆਬਾਦੀ ਵਧਾਉਣ ਲਈ ਹੋਰ ਯੂਰਪੀ ਦੇਸ਼ਾਂ ਤੋਂ ਪਰਵਾਸ ਨੂੰ ਉਤਸ਼ਾਹਿਤ ਕੀਤਾ। ਲੱਖਾਂ ਲੋਕ ਨਾਜ਼ੀ ਜਰਮਨੀ ਤੋਂ ਭੱਜ ਗਏ ਸਨ ਜਾਂ ਆਪਣੇ ਵਤਨ, ਜਿਨ੍ਹਾਂ ਉੱਤੇ ਹੁਣ ਸੋਵੀਅਤ ਰੂਸ ਦਾ ਕਬਜ਼ਾ ਸੀ, ਵਾਪਸ ਨਹੀਂ ਜਾ ਸਕਦੇ ਸਨ। ਇਹਨਾਂ ਬੇਘਰ ਹੋਏ ਲੋਕਾਂ ਵਿੱਚੋਂ ਲਗਭਗ 170,000 ਨੂੰ ਨਵੀਂ ਜ਼ਿੰਦਗੀ ਸ਼ੁਰੂ ਕਰਨ ਲਈ ਆਸਟ੍ਰੇਲੀਆ ਵਿੱਚ ਸਵੀਕਾਰ ਕੀਤਾ ਗਿਆ।

ਆਸਟ੍ਰੇਲੀਆ ਵਿੱਚ ਮਜ਼ਦੂਰਾਂ ਦੀ ਵੀ ਭਾਰੀ ਘਾਟ ਸੀ। ਉਸ ਸਮੇਂ ਦੀ ਸਰਕਾਰ ਦਾ ਮੰਨਣਾ ਸੀ ਕਿ ਦੇਸ਼ ਦੇ ਭਵਿੱਖ ਲਈ ਆਬਾਦੀ ਦਾ ਵਾਧਾ ਜ਼ਰੂਰੀ ਸੀ। 45 ਸਾਲ ਤੋਂ ਘੱਟ ਉਮਰ ਦੇ ਸਿਹਤਮੰਦ ਬਾਲਗ ਪਰਵਾਸੀ £10 ਵਿੱਚ ਆਸਟ੍ਰੇਲੀਆ ਆ ਸਕਦੇ ਸਨ ਅਤੇ ਉਹਨਾਂ ਦੇ ਬੱਚੇ ਮੁਫ਼ਤ ਸਫ਼ਰ ਕਰ ਸਕਦੇ ਸਨ। ਪਰ ਪਰਵਾਸੀ ਫਿਰ ਵੀ ਸਿਰਫ਼ ਬ੍ਰਿਟਿਸ਼ ਜਾਂ ਯੂਰਪੀ ਨਾਗਰਿਕਤਾ ਵਾਲਿਆਂ ਤੱਕ ਸੀਮਤ ਸਨ।