1900s ਦੇ ਸ਼ੁਰੂ ਵਿੱਚ ਪਰਵਾਸ

ਪਹਿਲੀ ਅਤੇ ਦੂਜੀ ਸੰਸਾਰ ਜੰਗ ਦੇ ਵਿਚਕਾਰਲੇ ਸਮੇਂ ਵਿੱਚ, ਆਸਟ੍ਰੇਲੀਆ ਵਿੱਚ ਦਾਖ਼ਲੇ ਲਈ ਸਖ਼ਤ ਸ਼ਰਤਾਂ ਬਰਕਰਾਰ ਰਹੀਆਂ। ਪਰ ਦੱਖਣੀ ਯੂਰਪ ਤੋਂ ਲੋਕਾਂ, ਖ਼ਾਸ ਕਰਕੇ ਮਰਦਾਂ, ਦੇ ਪਰਵਾਸ ਵਿੱਚ ਵਾਧਾ ਹੋਇਆ। ਉਹ ਆਪਣੇ ਨਾਲ ਬਹੁਤ ਸਾਰੇ ਹੁਨਰ, ਸਿੱਖਿਆ ਅਤੇ ਆਪਣੀਆਂ ਸੱਭਿਆਚਾਰਕ ਕਦਰਾਂ-ਕੀਮਤਾਂ ਲੈ ਕੇ ਆਏ। ਉਹਨਾਂ ਨੇ ਆਸਟ੍ਰੇਲੀਆ ਦੇ ਪੇਂਡੂ ਉਦਯੋਗਾਂ ਨੂੰ ਵਿਕਸਿਤ ਕਰਨ ਵਿੱਚ ਮਦਦ ਕੀਤੀ, ਅਤੇ ਸੜਕਾਂ ਤੇ ਰੇਲਵੇ ਬਣਾਏ। ਹੁਨਰਮੰਦ ਇਤਾਲਵੀ ਪੱਥਰ-ਕਾਰੀਗਰਾਂ ਨੇ ਸਰਕਾਰੀ ਇਮਾਰਤਾਂ ਅਤੇ ਰਿਹਾਇਸ਼ਾਂ ਦੀ ਉਸਾਰੀ ਵਿੱਚ ਵੱਡਾ ਯੋਗਦਾਨ ਪਾਇਆ।

1930 ਦੇ ਦਹਾਕੇ ਦੇ ਅੰਤ ਵਿੱਚ, ਯਹੂਦੀ ਸ਼ਰਨਾਰਥੀ ਯੂਰਪ ਤੋਂ ਆਉਣੇ ਸ਼ੁਰੂ ਹੋਏ। ਉਹ ਨਾਜ਼ੀ ਜਰਮਨੀ ਦੇ ਖ਼ਤਰੇ ਤੋਂ ਭੱਜ ਰਹੇ ਸਨ। ਉਹ ਜਰਮਨੀ, ਆਸਟਰੀਆ, ਚੈਕੋਸਲੋਵਾਕੀਆ, ਹੰਗਰੀ ਅਤੇ ਪੋਲੈਂਡ ਤੋਂ ਆਏ। ਉਹਨਾਂ ਵਿੱਚੋਂ ਬਹੁਤ ਸਾਰੇ ਉੱਚ-ਪੜ੍ਹੇ-ਲਿਖੇ ਸਨ ਅਤੇ ਉਹਨਾਂ ਨੇ ਆਸਟ੍ਰੇਲੀਆ ਦੀ ਆਰਥਿਕਤਾ ਅਤੇ ਸੱਭਿਆਚਾਰਕ ਜੀਵਨ ਵਿੱਚ ਵੱਡਾ ਯੋਗਦਾਨ ਪਾਇਆ।

ਦੂਜੀ ਸੰਸਾਰ ਜੰਗ ਵਿੱਚ ਫੜੇ ਗਏ ਲਗਭਗ 18,000 ਇਤਾਲਵੀ ਸਿਪਾਹੀਆਂ ਨੂੰ ਆਸਟ੍ਰੇਲੀਆ ਵਿੱਚ ਜੰਗੀ ਕੈਦੀ ਕੈਂਪਾਂ ਵਿੱਚ ਰੱਖਿਆ ਗਿਆ। ਉਹ ਕੈਂਪਾਂ ਵਿੱਚ ਥੋੜ੍ਹਾ ਸਮਾਂ ਹੀ ਰਹੇ, ਪਰ ਉਹਨਾਂ ਨਾਲ ਸਹੀ ਸਲੂਕ ਕੀਤਾ ਗਿਆ ਅਤੇ ਬਹੁਤਿਆਂ ਨੇ ਇਸ ਧਰਤੀ ਅਤੇ ਇੱਥੋਂ ਦੇ ਲੋਕਾਂ ਬਾਰੇ ਕੁਝ ਸਿੱਖਿਆ। ਜੰਗ ਤੋਂ ਬਾਅਦ, ਬਹੁਤ ਸਾਰੇ ਪਰਵਾਸੀ ਬਣ ਕੇ ਆਸਟ੍ਰੇਲੀਆ ਵਾਪਸ ਆਏ।