ਵੋਟ ਦਾ ਹੱਕ

'ਸਫ਼ਰਾਜੈੱਟ' ('Suffragettes') ਉਹ ਸ਼ਬਦ ਸੀ ਜੋ ਦੁਨੀਆ ਭਰ ਵਿੱਚ ਉਨ੍ਹਾਂ ਔਰਤਾਂ ਲਈ ਵਰਤਿਆ ਜਾਂਦਾ ਸੀ ਜੋ ਚੋਣਾਂ ਵਿੱਚ ਵੋਟ ਪਾਉਣ ਦੇ ਹੱਕ ਲਈ ਮੁਹਿੰਮ ਚਲਾਉਂਦੀਆਂ ਸਨ। 1880 ਅਤੇ 1890 ਦੇ ਦਹਾਕਿਆਂ ਦੌਰਾਨ ਹਰ ਬਸਤੀ ਵਿੱਚ ਘੱਟੋ-ਘੱਟ ਇੱਕ ਵੋਟ-ਹੱਕ ਸੰਸਥਾ ਸੀ। ਸਫ਼ਰਾਜੈੱਟਾਂ ਨੇ ਆਪਣੀਆਂ ਬਸਤੀਵਾਦੀ ਸੰਸਦਾਂ ਅੱਗੇ ਪੇਸ਼ ਕਰਨ ਲਈ ਪਟੀਸ਼ਨਾਂ ਉੱਤੇ ਹਜ਼ਾਰਾਂ ਦਸਤਖ਼ਤ ਇਕੱਠੇ ਕੀਤੇ।

1895 ਵਿੱਚ ਸਾਊਥ ਆਸਟ੍ਰੇਲੀਆ ਦੀਆਂ ਔਰਤਾਂ ਨੇ ਵੋਟ ਪਾਉਣ ਅਤੇ ਸੰਸਦ ਦੀ ਚੋਣ ਲੜਨ ਦਾ ਹੱਕ ਜਿੱਤਿਆ। 1899 ਵਿੱਚ ਵੈਸਟਰਨ ਆਸਟ੍ਰੇਲੀਆ (Western Australia) ਦੀਆਂ ਔਰਤਾਂ ਨੇ ਵੋਟ ਪਾਉਣ ਦਾ ਹੱਕ ਜਿੱਤਿਆ।

1902 ਵਿੱਚ ਆਸਟ੍ਰੇਲੀਆ ਪਹਿਲਾ ਦੇਸ਼ ਸੀ ਜਿਸ ਨੇ ਔਰਤਾਂ ਨੂੰ ਵੋਟ ਪਾਉਣ ਦਾ ਹੱਕ ਅਤੇ ਸੰਸਦ ਲਈ ਚੁਣੇ ਜਾਣ ਦਾ ਹੱਕ, ਦੋਵੇਂ ਦਿੱਤੇ। ਐਬੋਰਿਜਨਲ ਅਤੇ ਟੌਰਸ ਸਟ੍ਰੇਟ ਆਈਲੈਂਡਰ ਲੋਕਾਂ ਨੂੰ 1962 ਤੱਕ ਵੋਟ ਪਾਉਣ ਦਾ ਹੱਕ ਨਹੀਂ ਦਿੱਤਾ ਗਿਆ ਸੀ।

1923 ਵਿੱਚ ਐਡਿਥ ਕਾਵਨ (Edith Cowan) ਪਹਿਲੀ ਮਹਿਲਾ ਸੰਸਦ ਮੈਂਬਰ ਬਣੀ ਜਦੋਂ ਉਹ ਵੈਸਟਰਨ ਆਸਟ੍ਰੇਲੀਆ ਦੀ ਸੰਸਦ ਲਈ ਚੁਣੀ ਗਈ। 1943 ਵਿੱਚ ਏਨਿਡ ਲਾਇਨਜ਼ (Enid Lyons) ਆਸਟ੍ਰੇਲੀਆਈ ਸੰਸਦ ਲਈ ਚੁਣੀ ਜਾਣ ਵਾਲੀ ਪਹਿਲੀ ਔਰਤ ਸੀ।

ਕੈਥਰੀਨ ਸਪੈਂਸ (Catherine Spence) (1825–1910)

ਕੈਥਰੀਨ ਸਪੈਂਸ ਇੱਕ ਲੇਖਿਕਾ, ਪ੍ਰਚਾਰਕ, ਨਾਰੀਵਾਦੀ ਅਤੇ ਸਫ਼ਰਾਜੈੱਟ ਸੀ। ਉਹ ਸਕਾਟਲੈਂਡ ਤੋਂ ਆਸਟ੍ਰੇਲੀਆ ਆਈ ਅਤੇ ਉਸ ਨੇ ਸਕੂਲੀ ਕਿਤਾਬਾਂ ਅਤੇ ਆਸਟ੍ਰੇਲੀਆਈ ਜ਼ਿੰਦਗੀ ਬਾਰੇ ਇਨਾਮ-ਜੇਤੂ ਨਾਵਲ ਲਿਖੇ।

ਉਸ ਨੇ ਬੇਘਰ ਬੱਚਿਆਂ ਦੀ ਮਦਦ ਲਈ ਇੱਕ ਸੰਸਥਾ ਬਣਾਉਣ ਵਿੱਚ ਸਹਾਇਤਾ ਕੀਤੀ, ਅਤੇ ਨਵੇਂ ਕਿੰਡਰਗਾਰਟਨਾਂ ਅਤੇ ਕੁੜੀਆਂ ਲਈ ਸਰਕਾਰੀ ਸੈਕੰਡਰੀ ਸਕੂਲਾਂ ਦੀ ਹਮਾਇਤ ਕੀਤੀ।

ਉਹ ਸੰਸਦ ਲਈ ਖੜ੍ਹੀ ਹੋਣ ਵਾਲੀ ਪਹਿਲੀ ਔਰਤ ਸੀ। ਭਾਵੇਂ ਉਸ ਨੂੰ ਬਹੁਤ ਵੋਟਾਂ ਮਿਲੀਆਂ, ਪਰ ਉਹ ਸੀਟ ਨਾ ਜਿੱਤ ਸਕੀ। 1891 ਵਿੱਚ ਉਹ ਸਾਊਥ ਆਸਟ੍ਰੇਲੀਆ ਦੀ ਮਹਿਲਾ ਵੋਟ-ਹੱਕ ਲੀਗ (Women's Suffrage League of South Australia) ਦੀ ਉਪ-ਪ੍ਰਧਾਨ ਬਣੀ।

ਕੈਥਰੀਨ ਸਪੈਂਸ ਇਸ ਗੱਲ ਦਾ ਪ੍ਰਤੀਕ ਹੈ ਕਿ ਇੱਕ ਔਰਤ ਪਾਬੰਦੀਆਂ ਵਾਲੇ ਸਮਿਆਂ ਵਿੱਚ ਵੀ ਕੀ ਹਾਸਲ ਕਰ ਸਕਦੀ ਹੈ।