ਵਿਗਿਆਨਕ ਪ੍ਰਾਪਤੀਆਂ ਅਤੇ ਕਾਢਾਂ

ਆਸਟ੍ਰੇਲੀਅਨਾਂ ਦਾ ਦਵਾਈ, ਤਕਨਾਲੋਜੀ, ਖੇਤੀਬਾੜੀ, ਖਣਨ ਅਤੇ ਨਿਰਮਾਣ ਦੇ ਖੇਤਰਾਂ ਵਿੱਚ ਵਿਗਿਆਨਕ ਪ੍ਰਾਪਤੀਆਂ ਦਾ ਮਜ਼ਬੂਤ ਰਿਕਾਰਡ ਹੈ।

ਕਈ ਆਸਟ੍ਰੇਲੀਅਨਾਂ ਨੂੰ ਵਿਗਿਆਨਕ ਅਤੇ ਡਾਕਟਰੀ ਖੋਜਾਂ ਲਈ ਨੋਬਲ ਪੁਰਸਕਾਰ ਮਿਲ ਚੁੱਕਾ ਹੈ।

ਵਿਗਿਆਨਕ ਪ੍ਰਾਪਤੀਆਂ ਕਰਨ ਵਾਲਿਆਂ ਨੂੰ ਆਸਟ੍ਰੇਲੀਅਨ ਆਫ ਦ ਈਅਰ (Australian of the Year) ਪੁਰਸਕਾਰ ਵੀ ਮਿਲੇ ਹਨ। 2005 ਵਿੱਚ ਇਹ ਪੁਰਸਕਾਰ ਪ੍ਰੋਫ਼ੈਸਰ ਫ਼ਿਓਨਾ ਵੁੱਡ (Fiona Wood) ਨੂੰ ਮਿਲਿਆ, ਜਿਸ ਨੇ ਸੜੇ ਹੋਏ ਮਰੀਜ਼ਾਂ ਲਈ ਸਪ੍ਰੇ-ਔਨ ਸਕਿਨ ਵਿਕਸਿਤ ਕੀਤੀ। 2006 ਵਿੱਚ ਇਹ ਪੁਰਸਕਾਰ ਪ੍ਰੋਫ਼ੈਸਰ ਇਆਨ ਫ੍ਰੇਜ਼ਰ (Ian Frazer) ਨੂੰ ਮਿਲਿਆ, ਜਿਸ ਨੇ ਬੱਚੇਦਾਨੀ ਦੇ ਮੂੰਹ ਦੇ ਕੈਂਸਰ ਦਾ ਟੀਕਾ ਬਣਾਇਆ। 2007 ਵਿੱਚ ਪ੍ਰਮੁੱਖ ਵਾਤਾਵਰਣ ਵਿਗਿਆਨੀ ਪ੍ਰੋਫ਼ੈਸਰ ਟਿਮ ਫਲੈਨਰੀ (Tim Flannery) ਨੂੰ ਇਹ ਪੁਰਸਕਾਰ ਮਿਲਿਆ।

ਪ੍ਰੋਫ਼ੈਸਰ ਵੁੱਡ ਅਤੇ ਪ੍ਰੋਫ਼ੈਸਰ ਫ੍ਰੇਜ਼ਰ ਦੋਵੇਂ ਬ੍ਰਿਟੇਨ ਤੋਂ ਆਸਟ੍ਰੇਲੀਆ ਆ ਕੇ ਵਸੇ ਸਨ। ਪ੍ਰੋਫ਼ੈਸਰ ਫ੍ਰੇਜ਼ਰ ਦੇ ਸਹਿ-ਖੋਜੀ ਸਵਰਗਵਾਸੀ ਡਾ. ਜਿਆਨ ਜ਼ੌ (Jian Zhou) ਸਨ, ਜੋ ਚੀਨ ਤੋਂ ਆਏ ਸਨ ਅਤੇ ਆਸਟ੍ਰੇਲੀਅਨ ਨਾਗਰਿਕ ਵੀ ਬਣੇ।

ਡਾ. ਫ਼ਿਓਨਾ ਵੁੱਡ AM (ਜਨਮ 1958)

ਡਾ. ਵੁੱਡ ਆਸਟ੍ਰੇਲੀਆ ਦੇ ਸਭ ਤੋਂ ਨਵੀਨਤਾਕਾਰੀ ਅਤੇ ਸਤਿਕਾਰੇ ਜਾਂਦੇ ਸਰਜਨਾਂ ਤੇ ਖੋਜਕਾਰਾਂ ਵਿੱਚੋਂ ਇੱਕ ਹੈ। ਇੱਕ ਬਹੁਤ ਨਿਪੁੰਨ ਪਲਾਸਟਿਕ ਅਤੇ ਪੁਨਰ-ਨਿਰਮਾਣ ਸਰਜਨ ਅਤੇ ਦੁਨੀਆ ਦੀ ਮੋਹਰੀ ਸੜਨ-ਮਾਹਿਰ ਹੋਣ ਨਾਤੇ, ਉਸ ਨੇ ਸੜਨ ਦੇ ਇਲਾਜ ਵਿੱਚ ਖੋਜ ਅਤੇ ਤਕਨਾਲੋਜੀ ਦੇ ਵਿਕਾਸ ਦੀ ਅਗਵਾਈ ਕੀਤੀ ਹੈ।

2002 ਦੇ ਬਾਲੀ ਬੰਬ ਧਮਾਕਿਆਂ ਦੇ ਪੀੜਤਾਂ ਨਾਲ ਕੀਤੇ ਕੰਮ ਤੋਂ ਬਾਅਦ, ਡਾ. ਵੁੱਡ ਨੂੰ 2003 ਵਿੱਚ ਮੈਂਬਰ ਆਫ ਦ ਆਰਡਰ ਆਫ ਆਸਟ੍ਰੇਲੀਆ (Member of the Order of Australia) ਬਣਾਇਆ ਗਿਆ। ਸੜਨ ਦੇ ਇਲਾਜ ਵਿੱਚ ਉਸ ਦੇ ਯੋਗਦਾਨ ਨੂੰ ਉਦੋਂ ਮਾਨਤਾ ਮਿਲੀ ਜਦੋਂ ਉਸ ਨੂੰ 2005 ਵਿੱਚ ਆਸਟ੍ਰੇਲੀਅਨ ਆਫ ਦ ਈਅਰ ਚੁਣਿਆ ਗਿਆ।

ਪ੍ਰੋਫ਼ੈਸਰ ਫ੍ਰੈਡ ਹੌਲੋਜ਼ (Fred Hollows) (1929–1993)

ਪ੍ਰੋਫ਼ੈਸਰ ਫ੍ਰੈਡ ਹੌਲੋਜ਼ ਇੱਕ ਜੋਸ਼ੀਲੇ ਨੇਤਰ-ਰੋਗ ਮਾਹਿਰ (ਅੱਖਾਂ ਦੇ ਡਾਕਟਰ) ਸਨ ਜਿਨ੍ਹਾਂ ਨੇ ਆਸਟ੍ਰੇਲੀਆ ਅਤੇ ਵਿਕਾਸਸ਼ੀਲ ਦੇਸ਼ਾਂ ਵਿੱਚ ਦਸ ਲੱਖ ਤੋਂ ਵੱਧ ਲੋਕਾਂ ਦੀ ਨਜ਼ਰ ਵਾਪਸ ਲਿਆਉਣ ਵਿੱਚ ਮਦਦ ਕੀਤੀ। ਫ੍ਰੈਡ ਹੌਲੋਜ਼ ਦਾ ਜਨਮ ਨਿਊਜ਼ੀਲੈਂਡ ਵਿੱਚ ਹੋਇਆ ਸੀ। 1965 ਵਿੱਚ ਉਹ ਆਸਟ੍ਰੇਲੀਆ ਆ ਗਏ ਅਤੇ ਬਾਅਦ ਵਿੱਚ ਸਿਡਨੀ ਦੇ ਇੱਕ ਹਸਪਤਾਲ ਵਿੱਚ ਅੱਖਾਂ ਦੇ ਵਿਭਾਗ ਦੇ ਮੁਖੀ ਬਣੇ।

ਉਹ ਸਾਰੇ ਲੋਕਾਂ ਦੀ ਬਰਾਬਰੀ ਵਿੱਚ ਪੱਕਾ ਵਿਸ਼ਵਾਸ ਰੱਖਦੇ ਸਨ ਅਤੇ ਉਨ੍ਹਾਂ ਨੇ ਪਹਿਲੀ ਐਬੋਰਿਜਿਨਲ ਮੈਡੀਕਲ ਸਰਵਿਸ (Aboriginal Medical Service) ਸਥਾਪਿਤ ਕਰਨ ਵਿੱਚ ਮਦਦ ਕੀਤੀ, ਜਿਨ੍ਹਾਂ ਦੀ ਗਿਣਤੀ ਹੁਣ ਆਸਟ੍ਰੇਲੀਆ ਭਰ ਵਿੱਚ ਬਹੁਤ ਹੈ।

1980 ਤੱਕ, ਫ੍ਰੈਡ ਹੌਲੋਜ਼ ਵਿਕਾਸਸ਼ੀਲ ਦੇਸ਼ਾਂ ਵਿੱਚ ਅੱਖਾਂ ਦੀ ਸਿਹਤ ਦੇ ਪ੍ਰੋਗਰਾਮ ਸ਼ੁਰੂ ਕਰਵਾਉਣ ਲਈ ਦੁਨੀਆ ਭਰ ਵਿੱਚ ਸਫ਼ਰ ਕਰ ਰਹੇ ਸਨ। ਅਪ੍ਰੈਲ 1989 ਵਿੱਚ ਉਹ ਆਸਟ੍ਰੇਲੀਅਨ ਨਾਗਰਿਕ ਬਣੇ।

ਪ੍ਰੋਫ਼ੈਸਰ ਹੌਲੋਜ਼ ਦਾ ਚੰਗਾ ਕੰਮ ਦ ਫ੍ਰੈਡ ਹੌਲੋਜ਼ ਫਾਊਂਡੇਸ਼ਨ (The Fred Hollows Foundation) ਰਾਹੀਂ ਜਾਰੀ ਹੈ।