आन्ज्याक (Anzac) गाथा

एन्जाक परम्परा टर्की (Türkiye) को ग्यालिपोली प्रायद्वीपमा जन्मिएको थियो।

25 April 1915 मा ग्यालिपोलीमा भएको अवतरणले आठ महिना चलेको अभियानको सुरुवात गर्‍यो, जसमा 26,000 भन्दा बढी अस्ट्रेलियाली हताहत भए, जसमध्ये 8000 भन्दा बढी मारिए वा रोगका कारण मरे। ग्यालिपोली प्रायद्वीपमा सेवा गर्नेहरूको बहादुरी र भावनाले एउटा किंवदन्ती बनायो, र 'एन्जाक' शब्द अस्ट्रेलिया र न्युजिल्यान्डको भाषाको हिस्सा बन्यो।

25 April 1916 मा अस्ट्रेलिया, न्युजिल्यान्ड, इङ्ल्यान्ड र इजिप्टमा रहेका सेनाहरूले यो अवतरणको पहिलो वार्षिकोत्सव मनाए। त्यसपछि 25 April लाई एन्जाक दिवस भनिन थाल्यो।

1920 को दशकसम्ममा अस्ट्रेलियाभरि एन्जाक दिवसका समारोहहरू हुन थाले र राज्यहरूले एन्जाक दिवसलाई सार्वजनिक बिदा तोके। राजधानी सहरहरूमा ठूला युद्ध स्मारक बनाइए, र देशभरका सहर र नगरहरूमा रहेका स्मारकहरू त्यो र पछिका द्वन्द्वहरूमा मारिएका युवा पुरुष र महिलाहरूप्रतिको श्रद्धाञ्जली हुन्।

एन्जाक दिवस युद्ध, द्वन्द्व र शान्ति स्थापना कार्यमा सेवा गरेका सबैलाई, र उनीहरूको मेटशिप, विपत्तिसामु देखाइएको सहनशीलता तथा हाम्रो भविष्यका लागि गरिएको बलिदानलाई सम्मान गर्ने दिन हो। यो युद्धका विभिन्न अर्थहरूमाथि चिन्तन गर्ने दिन पनि हो।

आज एन्जाक दिवस अस्ट्रेलिया र संसारभरि मनाइन्छ। सेवाबाट फर्केका अस्ट्रेलियाली सैनिक पुरुष तथा महिला, शान्ति सैनिक र अन्य देशका भूतपूर्व सैनिकहरू सबै एन्जाक दिवसका जुलुसमा गर्वका साथ हिँड्छन्।