पहिलो विश्वयुद्ध (1914–18)

बसोबास गर्नेहरू र आदिवासी जनताबीचको द्वन्द्व बाहेक अस्ट्रेलियाको इतिहास उल्लेखनीय रूपमा शान्तिपूर्ण रहेको छ। यहाँ कुनै गृहयुद्ध वा क्रान्ति भएका छैनन्।

अस्ट्रेलियालीहरूका पुस्तौं-पुस्ता बेलायती साम्राज्यप्रति निकै वफादार रहे।

एसियाको नजिक रहेको युरोपेली चौकीका रूपमा अस्ट्रेलियाले इतिहासमा आफूलाई असुरक्षित महसुस गर्‍यो, विशेष गरी जापान ठूलो शक्ति बनेपछि। अस्ट्रेलियाको रक्षाका लागि हामी बेलायती साम्राज्य र त्यसको नौसैनिक शक्तिमा भर पर्थ्यौं। बेलायती साम्राज्यलाई बलियो राख्न र अस्ट्रेलियाको रक्षा गर्न अस्ट्रेलियाले दुवै विश्वयुद्धमा लड्यो।

अस्ट्रेलिया August 1914 मा पहिलो विश्वयुद्धमा सामेल भयो, र 1915 मा जर्मनीको सहयोगी टर्की (Türkiye) माथिको आक्रमणमा भाग लियो। अस्ट्रेलियन एन्ड न्युजिल्यान्ड आर्मी कोर (Anzacs) का सैनिकहरूलाई आक्रमण गर्न ग्यालिपोली प्रायद्वीपको आफ्नै भाग तोकियो।

टर्कीका सेनाले गोली बर्साइरहेकै बेला उनीहरूले भिरालो भीर चढ्नुपर्थ्यो। जसरी भए पनि उनीहरू भीर चढे र खाडल खनेर टिके, यद्यपि धेरै युवाको मृत्यु भयो। स्वदेशमा रहेका अस्ट्रेलियालीहरूले एन्जाकहरूको भावनामाथि अत्यन्तै गर्व गरे।

ग्यालिपोलीपछि अस्ट्रेलियाली सेनाहरू फ्रान्स र बेल्जियमको पश्चिमी मोर्चामा लडे। यहीँ उनीहरूले 'डिगर्स' (diggers) भन्ने नाम पाए, किनभने उनीहरूले धेरै समय खाडल खन्न र मर्मत गर्न बिताए। आफ्ना कमाण्डर लेफ्टिनेन्ट जनरल सर जोन मोनासको नेतृत्वमा अस्ट्रेलियाली डिगरहरूले जर्मनीविरुद्धका अन्तिम लडाइँहरूमा ठूला विजय हासिल गरे र आफूले सहयोग गरेका फ्रान्सेलीहरूको दीर्घकालीन कृतज्ञता कमाए।

अस्ट्रेलियाली सैनिक पुरुष तथा महिलाहरूले मध्यपूर्वमा पनि सेवा गरे, जसमा स्वेज नहरको रक्षा र मित्रराष्ट्रहरूद्वारा सिनाई प्रायद्वीप तथा प्यालेस्टाइनको विजयमा सहभागिता पर्छ।

सिम्पसन र उनको गधा— जोन सिम्पसन किर्कप्याट्रिक (1892–1915)

प्राइभेट जोन सिम्पसनले ग्यालिपोलीमा एम्बुलेन्स मेडिकल कोरमा स्ट्रेचर बोक्ने सैनिकका रूपमा सेवा गरे। पहाड र उपत्यकाबाट स्ट्रेचर बोक्न कठिन थियो। सेनाको आदेशविपरीत, उनले घाइते सिपाहीहरूलाई सुरक्षित ठाउँमा फर्काउन डफी नाम गरेको गधा प्रयोग गरे।

दिन र रात, घण्टौंसम्म, सिम्पसन र उनको गधाले लडाइँको मैदान र समुद्री किनारको शिविरबीच यात्रा गर्दै आफ्नो ज्यान जोखिममा राख्थे।

प्राइभेट जोन सिम्पसन 25 April 1915 मा ग्यालिपोली आइपुगेका थिए। ठ्याक्कै चार हप्तापछि शत्रुको मेसिनगनले उनको ज्यान लियो। किनारको शिविरका सैनिकहरूले मौन दुःखका साथ हेरिरहे, जब डफी घाइते सिपाहीलाई बोकेरै आफ्नो युवा मालिकबिना किनारतर्फ हिँड्दै थियो। जोन सिम्पसन किर्कप्याट्रिक एउटा अस्ट्रेलियाली किंवदन्ती हुन्।