आदिवासी आरक्षित क्षेत्रहरू (Aboriginal reserves)

आदिवासी जनता र बसोबास गर्नेहरूबीच जमिनका लागि भएका सुरुका लडाइँपछि, आदिवासी जनतालाई समाजको छेउमा बस्न बाध्य पारियो। कोही आउटब्याकका भेडा र गाईवस्तु फार्महरूमा निकै कम ज्यालामा काम गर्थे, जुन धेरै अवस्थामा कहिल्यै तिरिएन। औपनिवेशिक सरकारहरूले आदिवासी जनता बस्न सक्ने आरक्षित क्षेत्र (reserves) बनाए, तर ती क्षेत्रले उनीहरूलाई आफ्नो परम्परागत जीवन बिताउन दिँदैनथे। उदाहरणका लागि, उनीहरू आफूले चाहेजस्तो सिकार गर्न र खाद्य सङ्कलन गर्न स्वतन्त्र थिएनन्।

1800 को दशकको अन्ततिर औपनिवेशिक सरकारहरूले आदिवासी र टोरेस स्ट्रेट टापुवासी जनताका अधिकार खोसे। उनीहरूले आदिवासी र टोरेस स्ट्रेट टापुवासीहरू कहाँ बस्न सक्छन् र कोसँग विवाह गर्न सक्छन् भन्ने कुरा नियन्त्रण गरे। उनीहरूले धेरै आदिवासी र टोरेस स्ट्रेट टापुवासी बालबालिकालाई आमाबाबुबाट अलग गरी 'गोरा' परिवार वा सरकारी अनाथालयमा पठाए। यस्ता नीतिहरू 20 औं शताब्दीको मध्यसम्म कायम रहे। यी 'चोरिएका पुस्ता' (stolen generations) को विषय आज पनि धेरै आदिवासी र टोरेस स्ट्रेट टापुवासी जनता तथा अन्य अस्ट्रेलियालीहरूका लागि गहिरो दुःखको कारण छ, र 2008 मा अस्ट्रेलियाली संसद्मा राष्ट्रिय क्षमायाचनाको विषय बनेको थियो।