1800 का दशकहरूमा आप्रवासन

1800 को दशकको सुरुमा उपनिवेशहरूमा मुख्य समूहहरू अङ्ग्रेजी, स्कटिस, वेल्स र आयरिस मूलका थिए। अस्ट्रेलियाका धेरै मनोरञ्जन, सांस्कृतिक गतिविधि र धार्मिक अभ्यासहरूले ग्रेट ब्रिटेनकै झलक दिन्थे। युरोप र एसियाबाट आएका आप्रवासीका साना समूहहरू पनि थिए। 1800 को दशकमा आएका युरोपेलीहरूमा इटालियन, ग्रीक, पोल, माल्टिज र रुसीहरू, तथा वाइन उद्योगमा काम गर्ने फ्रान्सेली बसोबासकर्ता पर्थे। तिनीहरू प्रायः काम र भाग्य खोज्ने युवा पुरुष, वा आफ्नो जहाज छोडेर भागेका नाविक थिए।

1842 पछि चिनियाँ आप्रवासीहरू अस्ट्रेलिया आउन थाले, र सुन पत्ता लागेपछि उनीहरूको सङ्ख्या बढ्यो। सुन खानी क्षेत्रमा जातीय तनाव थियो, जसले कहिलेकाहीँ चिनियाँविरुद्ध दङ्गा निम्त्यायो, जस्तै 1854 मा बेन्डिगोमा भएको। यी जातीय तनावका कारण 1855 मा भिक्टोरिया र 1861 मा न्यु साउथ वेल्समा आप्रवासनमाथि पहिलो प्रतिबन्धहरू लागे।

1850 को दशकको सुनको लहरपछि धेरै चिनियाँ स्वदेश फर्के। बसेकाहरूमा ती बजार-बगैँचा चलाउनेहरू थिए, जसले पानीको अभाव भएका क्षेत्रमा अत्यन्त आवश्यक ताजा फलफूल र तरकारी उपलब्ध गराउँथे।

1860 को दशकदेखि इरान, इजिप्ट र टर्की (Türkiye) बाट मानिसहरू अस्ट्रेलियाको आउटब्याकमा ऊँटका 'ट्रेन' चलाउन आए। भारतीय ऊँट चालकहरूसँगै उनीहरूलाई सामान्यतया 'अफगान' भनिन्थ्यो, मुख्यतया उनीहरूको मिल्दोजुल्दो पहिरन र साझा इस्लामी धार्मिक विश्वासका कारण। यी ऊँट चालकहरूलाई 'भित्री भूभागका अग्रगामी' मानिन्थ्यो।

क्वीन्सल्यान्डमा उखु र केराको उद्योगमा काम गर्ने भारतीय र प्रशान्त द्वीपवासीहरू पनि थिए, जो प्रायः निकै कम ज्यालामा र नराम्रो अवस्थामा काम गर्थे।

1880 को दशकदेखि लेबननबाट कामदारहरू अस्ट्रेलिया आइपुगे। धेरै जना कपडा र लुगा उद्योगमा संलग्न थिए, र ग्रामीण अस्ट्रेलियाका अधिकांश कपडा पसल लेबनानी परिवारहरूको स्वामित्वमा आयो।