अन्तर्राष्ट्रिय मञ्चहरूमा सक्रिय सहभागिता

अस्ट्रेलिया 1945 मा संयुक्त राष्ट्र संघ (United Nations, UN) को स्थापनादेखि नै यसको सक्रिय सदस्य रहँदै आएको छ। अस्ट्रेलियाले 1951 को UN शरणार्थी महासन्धि (UN Refugee Convention) अन्तर्गत शरणार्थी पहिचान भएका मानिसहरूलाई संरक्षण प्रदान गर्छ। यसले UN का शान्ति स्थापना प्रयास तथा विकासोन्मुख देशहरूका लागि मानवीय र आपतकालीन प्रतिकार्यमा पनि योगदान गर्छ, र UN शैक्षिक, वैज्ञानिक तथा सांस्कृतिक संगठन (UNESCO) मा बलियो संलग्नता राख्छ।

1971 मा, अस्ट्रेलिया आर्थिक सहयोग तथा विकास संगठन (Organisation for Economic Cooperation and Development, OECD) को पूर्ण सदस्य बन्यो। OECD को उद्देश्य विश्व व्यापार विस्तार गर्दै विश्वभरका मानिसहरूको आर्थिक र सामाजिक कल्याण सुधार गर्नु हो।

अस्ट्रेलियाले एसिया-प्रशान्त क्षेत्रमा घनिष्ठ सहकार्यलाई बलियो समर्थन गर्छ। यो Asia-Pacific Economic Cooperation, East Asia Summit र Pacific Islands Forum को सक्रिय सदस्य हो। यो Association of Southeast Asian Nations को संवाद साझेदार हो र यसको Regional Forum मा सहभागी हुन्छ।

डा. क्याथरिन ह्यामलिन AC (Dr Catherine Hamlin AC) (जन्म 1924–2020)

डा. क्याथरिन ह्यामलिन स्त्रीरोग विशेषज्ञ थिइन्, जो युवा इथियोपियाली महिलाहरूलाई पीडाको जीवनबाट बचाएकामा प्रसिद्ध छिन्। 1959 देखि डा. ह्यामलिनले इथियोपियाको Addis Ababa मा ‘obstetric fistula’ भनिने प्रसवजन्य चोट भएका महिलाहरूलाई मद्दत गर्दै काम गरिन्। यो आन्तरिक चोट भएका महिलाहरूले आफ्नो शारीरिक क्रियाकलाप नियन्त्रण गर्न सक्दैनन् र अपमानित भई आफ्नो समुदायबाट बहिष्कृत हुन्छन्।

डा. ह्यामलिन र उनका पतिले Addis Ababa Fistula Hospital स्थापना गरे। उनीहरूको प्रयासले हजारौं महिला घर फर्केर पूर्ण, स्वस्थ जीवन बिताउन सक्षम भएका छन्।

1995 मा, डा. ह्यामलिनलाई अस्ट्रेलियाको सर्वोच्च सम्मान, Companion of the Order of Australia बनाइयो।