آسٹریلین آف دی ایئر (Australian of the Year)

1960 سے آسٹریلین آف دی ایئر ایوارڈز نمایاں آسٹریلوی لوگوں کی کامیابیوں اور خدمات کا جشن مناتے آئے ہیں۔ کوئی بھی شخص کسی بھی شعبۂ زندگی سے تعلق رکھنے والے آسٹریلوی کو ایوارڈ کے لیے نامزد کر سکتا ہے۔

آسٹریلین آف دی ایئر وہ لوگ ہوتے ہیں جنہوں نے اپنے کام میں کمال حاصل کیا اور قوم کی خدمت کی۔ وہ ہمیں ایک بہتر آسٹریلیا بنانے میں اپنا حصہ ڈالنے کی ترغیب اور چیلنج دیتے ہیں۔

ان ایوارڈز میں ینگ آسٹریلین آف دی ایئر، سینئر آسٹریلین آف دی ایئر اور آسٹریلیاز لوکل ہیرو شامل ہیں۔

موجودہ اور سابقہ وصول کنندگان کی فہرست www.australianoftheyear.org.au پر دستیاب ہے۔

ڈاکٹر جیمز میوکے AM (James Muecke)

آنکھوں کے سرجن اور نابینا پن کی روک تھام کے علمبردار 2020 آسٹریلین آف دی ایئر

ڈاکٹر میوکے سائٹ فار آل (Sight For All) کے شریک بانی ہیں، جو ایک خیراتی ادارہ ہے اور تحقیق، تعلیم، انفراسٹرکچر اور شراکت دار ممالک میں ساتھیوں کی تربیت کے ذریعے نابینا پن کو ختم کرنے کا ہدف رکھتا ہے۔

ڈاکٹر میوکے کا ماننا ہے کہ نابینا پن انسانی حقوق کا مسئلہ ہے اور وہ ایسی دنیا بنانے کے لیے کام کر رہے ہیں جہاں ہر شخص دیکھ سکے۔

پروفیسر مشیل سیمنز (Michelle Simmons) (پیدائش 1967)

کوانٹم فزکس کی پروفیسر 2018 آسٹریلین آف دی ایئر

پروفیسر سیمنز جوہری الیکٹرانکس اور کوانٹم کمپیوٹنگ میں علمبردار ہیں۔ جسے وہ ”کمپیوٹنگ کے دور کی خلائی دوڑ“ کہتی ہیں، اُس میں سب سے آگے رہتے ہوئے پروفیسر سیمنز ایک ایسا کوانٹم کمپیوٹر بنانا چاہتی ہیں جو ایسے مسائل منٹوں میں حل کر سکے جن پر ورنہ ہزاروں سال لگ جائیں۔ ایسی دریافت میں دواؤں کے ڈیزائن، موسم کی پیش گوئی، خودکار گاڑیوں، مصنوعی ذہانت اور مزید شعبوں میں انقلاب لانے کی صلاحیت ہے۔

2018 میں پروفیسر سیمنز کو کوانٹم انفارمیشن سائنس میں اُن کے کام اور لگن پر آسٹریلین آف دی ایئر قرار دیا گیا۔ 2019 میں اُنہیں اُن کی ”کوانٹم اور جوہری الیکٹرانکس میں ایک رہنما اور ایک نمونۂ عمل کے طور پر سائنس کی تعلیم کے لیے نمایاں خدمات“ کے اعتراف میں آفیسر آف دی آرڈر آف آسٹریلیا مقرر کیا گیا۔