آسٹریلوی کرنسی

ہماری کرنسی پر بنی تصویریں اُن لوگوں اور علامتوں کو دکھاتی ہیں جو آسٹریلیا کے لیے اہم ہیں۔

ہماری کرنسی پر آنے کے لیے چنے گئے لوگ وہ ہیں جنہوں نے سماجی اصلاح، سائنس، سیاست، فوجی کارناموں اور فنون کے شعبوں میں پہل اور بڑی صلاحیت دکھائی۔

ملکہ الزبتھ دوم (Queen Elizabeth II) (1926–2022)

ملکہ الزبتھ دوم آسٹریلیا کی سربراہِ مملکت تھیں۔ وہ آسٹریلیا اور برطانیہ کی ملکہ تھیں۔ وہ اپنے طویل اور مقبول دورِ حکومت میں ایک مضبوط، مستحکم موجودگی رہیں۔

پارلیمنٹ ہاؤس (Parliament House) اور فورکورٹ موزیک

پارلیمنٹ ہاؤس کا خاکہ ڈیزائن ڈیولپمنٹ لینڈ اسکیپ پلان پر مبنی تھا، جو پارلیمنٹ ہاؤس کنسٹرکشن اتھارٹی نے فراہم کیا تھا۔ فورکورٹ موزیک مائیکل نیلسن جاگامارا (Michael Nelson Jagamara) کی سنٹرل ڈیزرٹ ڈاٹ طرز کی پینٹنگ ’پوسم اینڈ ویلابی ڈریمنگ‘ (‘Possum and Wallaby Dreaming’) پر مبنی ہے۔

ڈیم میری گلمور (Dame Mary Gilmore) (1865–1962)

ڈیم میری گلمور ایک مصنفہ، صحافی، شاعرہ اور سماجی اصلاح کی مہم چلانے والی تھیں۔ اُنہیں اُن کی تحریروں اور عورتوں، غریب لوگوں، اور ابوریجنل اور ٹورس اسٹریٹ آئی لینڈر لوگوں کے حق میں آواز اٹھانے کے لیے یاد کیا جاتا ہے۔

اے بی ’بینجو‘ پیٹرسن (AB ‘Banjo’ Paterson) (1864–1941)

اینڈریو بارٹن پیٹرسن ایک شاعر، نغمہ نگار اور صحافی تھے۔ وہ ’بینجو‘ پیٹرسن کے نام سے لکھتے تھے اور خاص طور پر آسٹریلیا کے مشہور ترین لوک گیت ’والٹزنگ ماٹلڈا‘ (‘Waltzing Matilda’) کے بول لکھنے کے لیے یاد کیے جاتے ہیں۔

ریورنڈ جان فلن (Reverend John Flynn) (1880–1951)

ریورنڈ جان فلن نے دنیا کی پہلی فضائی طبی سروس، رائل فلائنگ ڈاکٹر سروس آف آسٹریلیا شروع کی۔ اُنہیں آسٹریلیا کے دور دراز علاقوں تک صحت کی خدمات پہنچا کر بہت سی جانیں بچانے کے لیے یاد کیا جاتا ہے۔

میری ریبی (Mary Reibey) (1777–1855)

میری ریبی نیو ساؤتھ ویلز کی نوآبادی میں ایک علمبردار کاروباری خاتون تھیں۔ نوعمری میں ایک قیدی آبادکار کے طور پر آسٹریلیا پہنچنے کے بعد، وہ برادری میں ایک قابلِ احترام رہنما بن گئیں۔

ایڈتھ کوون (Edith Cowan) (1861–1932)

ایڈتھ کوون ایک سماجی کارکن، سیاست دان اور حقوقِ نسواں کی حامی تھیں۔ وہ کسی بھی آسٹریلوی پارلیمنٹ کے لیے منتخب ہونے والی پہلی خاتون تھیں۔

ڈیوڈ یونائپن (David Unaipon) (1872–1967)

ڈیوڈ یونائپن ایک مصنف، مقرر اور موجد تھے۔ اُنہیں سائنس اور ادب میں اُن کی خدمات کے لیے، اور ابوریجنل اور ٹورس اسٹریٹ آئی لینڈر لوگوں کے حالات بہتر بنانے کے لیے یاد کیا جاتا ہے۔

سر جان موناش (Sir John Monash) (1865–1931)

سر جان موناش ایک انجینئر، منتظم اور آسٹریلیا کے عظیم ترین فوجی کمانڈروں میں سے ایک تھے۔ اُنہیں اُن کی قیادت، ذہانت اور خطابت کے لیے یاد کیا جاتا ہے۔

ڈیم نیلی میلبا (Dame Nellie Melba) (1861–1931)

ڈیم نیلی میلبا ایک عالمی شہرت یافتہ سوپرانو گلوکارہ تھیں۔ دنیا بھر میں ’ملکۂ نغمہ‘ کے نام سے مشہور، وہ پہلی آسٹریلوی گلوکارہ تھیں جنہوں نے بین الاقوامی شہرت حاصل کی۔