Ang Snowy Mountains Hydro-Electric Scheme

Noong 1949, sinimulan ng pamahalaan ang gawain sa isang matapang na proyekto upang salukin ang tubig ng Snowy River bago ito umagos patungo sa dagat sa silangang Victoria. Ang mga tubig na ito ay inilihis upang umagos papasok sa lupain para sa patubig at gamitin sa paggawa ng kuryente. Isa itong napakalaking proyekto na tumagal ng 25 taon bago matapos.

Ito ang pinakamalaking proyektong inhinyeriya sa Australia. Isa rin ito sa pinakamalalaking hydro-electric na proyekto sa mundo at kinikilala bilang isa sa mga makabagong kahanga-hangang gawa ng civil engineering sa mundo.

Ang Snowy Mountains Scheme ay matatagpuan sa Kosciusko National Park, New South Wales. Binubuo ito ng 16 pangunahing dam, pitong power station, isang pumping station at 225 kilometro ng mga tunnel, tubo at akwedukto. Karamihan dito ay nasa ilalim ng lupa. Ang proyekto ay nagbibigay ng mahalagang tubig sa mga bukirin ng panloob na New South Wales at Victoria. Ang mga power station nito ay gumagawa rin ng hanggang 10 porsiyento ng kuryente ng New South Wales.

Nagsimula ang gawain sa proyekto noong 1949 at natapos noong 1974. Mahigit 100,000 katao mula sa mahigit 30 bansa ang nagtrabaho sa proyekto. Pitumpung porsiyento ng mga manggagawang ito ay mga migrante. Pagkatapos makumpleto ang proyekto, karamihan sa mga manggagawang Europeo ay nanatili sa Australia, na ipinagpatuloy ang kanilang mahalagang ambag sa multikultural na lipunan ng Australia.

Ang Snowy Mountains Scheme ay isang mahalagang simbolo ng pagkakakilanlan ng Australia bilang isang malaya, multikultural at maparaang bansa.