Ang salapi ng Australia

Ang mga larawan sa ating salapi ay naglalarawan ng mga taong at simbolong mahalaga sa Australia.

Ang mga taong pinili upang lumitaw sa ating salapi ay mga taong nagpakita ng inisyatiba at dakilang talento sa larangan ng repormang panlipunan, agham, pulitika, tagumpay na militar at sining.

Reyna Elizabeth II (1926–2022)

Si Reyna Elizabeth II ang Pinuno ng Estado ng Australia. Siya ang Reyna ng Australia at ng United Kingdom. Siya ay isang matatag at panatag na presensya sa buong mahaba at popular niyang paghahari.

Ang Parliament House at ang Forecourt Mosaic

Ang eskematikong plano ng Parliament House ay ibinatay sa Design Development Landscape Plan, na ibinigay ng Parliament House Construction Authority. Ang Forecourt Mosaic ay ibinatay sa isang pinturang tuldok-estilo ng Central Desert ni Michael Nelson Jagamara na pinamagatang 'Possum and Wallaby Dreaming'.

Dame Mary Gilmore (1865–1962)

Si Dame Mary Gilmore ay isang may-akda, mamamahayag, makata at tagapagtaguyod ng repormang panlipunan. Naaalala siya dahil sa kanyang mga akda at sa pagsasalita para sa kapakanan ng mga babae, mahihirap, at ng mga Aboriginal at Torres Strait Islander.

AB 'Banjo' Paterson (1864–1941)

Si Andrew Barton Paterson ay isang makata, mangangatha ng awit at mamamahayag. Sumulat siya sa ilalim ng pangalang 'Banjo' Paterson at naaalala lalo na dahil sa pagsulat ng mga salita ng 'Waltzing Matilda', ang pinakatanyag na awiting bayan sa Australia.

Reverend John Flynn (1880–1951)

Sinimulan ni Reverend John Flynn ang unang serbisyong medikal sa himpapawid sa mundo, ang Royal Flying Doctor Service of Australia. Naaalala siya dahil sa pagliligtas ng maraming buhay sa pamamagitan ng pagdadala ng mga serbisyong pangkalusugan sa malalayong bahagi ng Australia.

Mary Reibey (1777–1855)

Si Mary Reibey ay isang tagapanguna na babaeng negosyante sa kolonya ng New South Wales. Matapos dumating sa Australia bilang isang tinedyer na bilanggong naninirahan, naging isa siyang iginagalang na lider sa pamayanan.

Edith Cowan (1861–1932)

Si Edith Cowan ay isang social worker, pulitiko at peminista. Siya ang unang babaeng nahalal sa alinmang parlamento sa Australia.

David Unaipon (1872–1967)

Si David Unaipon ay isang manunulat, pampublikong tagapagsalita at imbentor. Naaalala siya dahil sa kanyang mga ambag sa agham at panitikan, at sa pagpapabuti ng kalagayan ng mga Aboriginal at Torres Strait Islander.

Sir John Monash (1865–1931)

Si Sir John Monash ay isang inhinyero, administrador at isa sa mga pinakadakilang kumandanteng militar ng Australia. Naaalala siya dahil sa kanyang pamumuno, talino at kahusayan sa pagsasalita.

Dame Nellie Melba (1861–1931)

Si Dame Nellie Melba ay isang sikat sa buong mundong soprano. Kilala sa buong mundo bilang 'Reyna ng Awit', siya ang unang Australyanong mang-aawit na naging tanyag sa buong daigdig.