ஆஸ்திரேலிய மக்கள்

ஆஸ்திரேலியா உலகின் மிகவும் பன்முகத்தன்மை கொண்ட சமூகங்களில் ஒன்றாகும். மக்கள்தொகையில் ஏறக்குறைய மூன்று சதவீதம் பேர் தங்களை ஆதிவாசி மற்றும்/அல்லது டோரஸ் நீரிணை தீவு மக்கள் (Aboriginal and/or Torres Strait Islander) என அடையாளப்படுத்திக் கொள்கிறார்கள். ஆஸ்திரேலியாவின் குடியிருப்பாளர்களில் கால் பங்குக்கு மேற்பட்டோர் வெளிநாட்டில் பிறந்தவர்கள்; 200-க்கும் மேற்பட்ட நாடுகளிலிருந்து குடிபெயர்ந்தவர்கள். மக்கள்தொகையின் பன்முகத்தன்மை ஆஸ்திரேலியாவுக்கு மொழிகள், நம்பிக்கைகள், பாரம்பரியங்கள் மற்றும் பண்பாடுகளின் வளமான பல்வகைமையை அளிக்கிறது.

காமன்வெல்த் நாடுகளின் (the Commonwealth of Nations) உறுப்பினராக, ஆஸ்திரேலியா இன்னும் ஐக்கிய இராச்சியத்துடன் நெருங்கிய உறவுகளைக் கொண்டுள்ளது.

ஆஸ்திரேலிய மக்கள் ஆஸ்திரேலியக் குடியுரிமையில் பெருமை கொள்கிறார்கள்; அது நமது பன்முகச் சமூகத்தில் ஒரு முக்கியமான ஒற்றுமைப் பிணைப்பாகும். ஆஸ்திரேலியக் குடியுரிமை தினம் ஒவ்வொரு ஆண்டும் 17 செப்டம்பர் அன்று கொண்டாடப்படுகிறது. நமது தேசத்தைக் கட்டமைப்பதிலும் நமது நாட்டின் எதிர்காலத்தை வடிவமைப்பதிலும் நாம் ஆற்றும் பங்கை அனைத்து ஆஸ்திரேலியக் குடிமக்களும் சிந்திக்கும் நாள் இது.