ਬਹੁ-ਸੱਭਿਆਚਾਰਕ ਪਰਵਾਸ

1950 ਅਤੇ 1960 ਦੇ ਦਹਾਕਿਆਂ ਵਿੱਚ, ਕਈ ਏਸ਼ੀਆਈ, ਚਰਚ ਅਤੇ ਹੋਰ ਸਮੂਹਾਂ ਸਮੇਤ ਇੱਕ ਵਧਦੀ ਹੋਈ ਲਹਿਰ ਨੇ 'ਗੋਰਾ ਆਸਟ੍ਰੇਲੀਆ' (White Australia) ਨੀਤੀ ਨੂੰ ਖ਼ਤਮ ਕਰਨ ਦੀ ਕੋਸ਼ਿਸ਼ ਕੀਤੀ।

1958 ਵਿੱਚ ਸਰਕਾਰ ਨੇ ਲਿਖਤੀ ਇਮਲਾ ਟੈਸਟ (dictation test) ਹਟਾ ਦਿੱਤਾ ਅਤੇ 1966 ਵਿੱਚ ਆਸਟ੍ਰੇਲੀਆ ਨੇ ਚੋਣਵੇਂ ਗ਼ੈਰ-ਯੂਰਪੀ ਅਤੇ ਹੁਨਰਮੰਦ ਏਸ਼ੀਆਈ ਪਰਵਾਸ ਸ਼ੁਰੂ ਕੀਤਾ। ਆਖ਼ਰਕਾਰ, ਹਰ ਥਾਂ ਆਸਟ੍ਰੇਲੀਆਈ ਲੋਕਾਂ ਨੇ ਆਸਟ੍ਰੇਲੀਆ ਦੇ ਪਰਵਾਸ ਪ੍ਰੋਗਰਾਮ ਵਿੱਚ ਸਾਰੀਆਂ ਕੌਮਾਂ ਨੂੰ ਸ਼ਾਮਲ ਕਰਨ ਦੀ ਕੀਮਤ ਨੂੰ ਪਛਾਣਿਆ।

1973 ਵਿੱਚ 'ਗੋਰਾ ਆਸਟ੍ਰੇਲੀਆ' ਨੀਤੀ ਖ਼ਤਮ ਹੋ ਗਈ, ਅਤੇ ਆਸਟ੍ਰੇਲੀਆ ਬਹੁ-ਸੱਭਿਆਚਾਰਵਾਦ ਦੇ ਰਾਹ ਉੱਤੇ ਪੈ ਗਿਆ। ਇਸ ਸਮੇਂ ਤੋਂ ਸਰਕਾਰ ਨੇ ਪਰਵਾਸ ਲਈ ਸਾਰੇ ਨਸਲੀ ਮਾਪਦੰਡ ਹਟਾ ਦਿੱਤੇ। 1975 ਵਿੱਚ, ਵੀਅਤਨਾਮ ਜੰਗ ਤੋਂ ਬਾਅਦ, ਆਸਟ੍ਰੇਲੀਆ ਨੇ ਰਿਕਾਰਡ ਗਿਣਤੀ ਵਿੱਚ ਏਸ਼ੀਆਈ ਸ਼ਰਨਾਰਥੀ ਅਤੇ ਪਰਵਾਸੀ ਸਵੀਕਾਰ ਕੀਤੇ, ਜ਼ਿਆਦਾਤਰ ਵੀਅਤਨਾਮ, ਚੀਨ ਅਤੇ ਭਾਰਤ ਤੋਂ।

1945 ਤੋਂ ਲੈ ਕੇ, ਲੱਖਾਂ ਲੋਕ ਆਸਟ੍ਰੇਲੀਆ ਵਿੱਚ ਰਹਿਣ ਲਈ ਆਏ ਹਨ, ਜਿਨ੍ਹਾਂ ਵਿੱਚ ਜੰਗ ਨਾਲ ਤਬਾਹ ਹੋਏ ਦੇਸ਼ਾਂ ਦੇ ਬਹੁਤ ਸਾਰੇ ਸ਼ਰਨਾਰਥੀ ਵੀ ਸ਼ਾਮਲ ਹਨ। ਅੱਜ ਆਸਟ੍ਰੇਲੀਆ ਦੇ ਪਰਵਾਸੀ ਦੁਨੀਆ ਭਰ ਤੋਂ ਆਉਂਦੇ ਹਨ।

ਆਸਟ੍ਰੇਲੀਆ ਦੀ ਸ਼ਮੂਲੀਅਤ ਦੀ ਸਰਗਰਮ ਨੀਤੀ ਹੈ, ਜਿਸ ਵਿੱਚ ਹਰ ਨਸਲ, ਨਸਲੀ ਪਿਛੋਕੜ ਜਾਂ ਸੱਭਿਆਚਾਰ ਦਾ ਹਰ ਵਿਅਕਤੀ ਆਪਣੇ ਆਪ ਨੂੰ ਸਾਡੇ ਸਮਾਜ ਦਾ ਹਿੱਸਾ ਮਹਿਸੂਸ ਕਰ ਸਕਦਾ ਹੈ। ਇਹ ਨੀਤੀ ਆਸਟ੍ਰੇਲੀਆਈ ਸਮਾਜ ਦੇ ਹਰ ਪੱਖ ਵਿੱਚ, ਸਰਕਾਰੀ ਨੀਤੀਆਂ ਸਮੇਤ, ਚੱਲਦੀ ਹੈ। ਇਹ ਸਾਡੇ ਸਿੱਖਿਆ ਪਾਠਕ੍ਰਮ ਵਿੱਚ ਬਚਪਨ ਤੋਂ ਯੂਨੀਵਰਸਿਟੀ ਤੱਕ ਝਲਕਦੀ ਹੈ, ਅਤੇ ਹਰ ਕੰਮ ਵਾਲੀ ਥਾਂ ਉੱਤੇ ਅਮਲ ਵਿੱਚ ਲਿਆਂਦੀ ਜਾਂਦੀ ਹੈ।

ਹਰ ਵਿਅਕਤੀ ਦੇ ਬਰਾਬਰ ਅਤੇ ਬਿਨਾਂ ਵਿਤਕਰੇ ਦੇ ਸਲੂਕ ਪਾਉਣ ਦੇ ਹੱਕ ਦੀ ਰਾਖੀ ਆਸਟ੍ਰੇਲੀਆਈ ਮਨੁੱਖੀ ਅਧਿਕਾਰ ਕਮਿਸ਼ਨ (Australian Human Rights Commission) ਅਤੇ ਹਰ ਰਾਜ ਤੇ ਪ੍ਰਦੇਸ਼ ਦੀਆਂ ਸਰਕਾਰੀ ਵਿਤਕਰਾ-ਵਿਰੋਧੀ ਏਜੰਸੀਆਂ ਕਰਦੀਆਂ ਹਨ। ਨਸਲੀ ਵਿਤਕਰੇ ਦੀ ਜਨਤਕ ਤੌਰ ਉੱਤੇ ਨਿਖੇਧੀ ਕੀਤੀ ਜਾਂਦੀ ਹੈ ਅਤੇ ਇਹ ਕਾਨੂੰਨ ਹੇਠ ਜੁਰਮ ਹੈ।

ਆਸਟ੍ਰੇਲੀਆ ਮੇਲ-ਜੋਲ ਅਤੇ ਸਵੀਕਾਰਤਾ ਵਾਲਾ ਬਹੁ-ਸੱਭਿਆਚਾਰਕ ਸਮਾਜ ਬਣ ਗਿਆ ਹੈ। ਇਹ ਇੱਕ ਅਜਿਹਾ ਦੇਸ਼ ਹੈ ਜਿੱਥੇ ਪਰਵਾਸੀ, ਮੂਲਵਾਸੀ ਆਸਟ੍ਰੇਲੀਆਈ ਅਤੇ ਆਸਟ੍ਰੇਲੀਆ ਵਿੱਚ ਜੰਮਿਆ ਹਰ ਕੋਈ ਸ਼ਾਂਤੀ ਨਾਲ ਆਪਣੇ ਟੀਚਿਆਂ ਪਿੱਛੇ ਲੱਗਣ ਲਈ ਆਜ਼ਾਦ ਮਹਿਸੂਸ ਕਰ ਸਕਦਾ ਹੈ।

ਡਾ. ਵਿਕਟਰ ਚੈਂਗ (Dr Victor Chang) (1936–91)

ਡਾ. ਵਿਕਟਰ ਚੈਂਗ ਆਸਟ੍ਰੇਲੀਆ ਦੇ ਸਭ ਤੋਂ ਵਧੀਆ ਦਿਲ ਦੇ ਸਰਜਨਾਂ ਵਿੱਚੋਂ ਇੱਕ ਸੀ। ਵਿਕਟਰ ਪੀਟਰ ਚੈਂਗ ਯਾਮ ਹਿਮ ਦਾ ਜਨਮ 1936 ਵਿੱਚ ਚੀਨ ਵਿੱਚ ਹੋਇਆ ਅਤੇ ਉਹ 15 ਸਾਲ ਦੀ ਉਮਰ ਵਿੱਚ ਆਸਟ੍ਰੇਲੀਆ ਆਇਆ।

ਉਸ ਨੇ ਸਿਡਨੀ ਦੇ ਸੇਂਟ ਵਿਨਸੈਂਟਸ ਹਸਪਤਾਲ (St Vincent's Hospital) ਵਿੱਚ ਕੰਮ ਕੀਤਾ ਅਤੇ 1984 ਵਿੱਚ ਉਸ ਨੇ ਆਸਟ੍ਰੇਲੀਆ ਵਿੱਚ ਦਿਲ ਦੇ ਟ੍ਰਾਂਸਪਲਾਂਟ ਵਿੱਚ ਮਾਹਰ ਪਹਿਲਾ ਕੇਂਦਰ ਸਥਾਪਿਤ ਕੀਤਾ। 1986 ਵਿੱਚ ਵਿਕਟਰ ਨੂੰ ਕੰਪੈਨੀਅਨ ਆਫ਼ ਦ ਆਰਡਰ ਆਫ਼ ਆਸਟ੍ਰੇਲੀਆ (Companion of the Order of Australia) ਬਣਾਇਆ ਗਿਆ।

ਵਿਕਟਰ ਨੂੰ ਦਾਨੀਆਂ ਦੀ ਘਾਟ ਦੀ ਚਿੰਤਾ ਹੋਈ, ਇਸ ਲਈ ਉਸ ਨੇ ਇੱਕ ਬਣਾਉਟੀ ਦਿਲ ਦਾ ਡਿਜ਼ਾਈਨ ਬਣਾਉਣਾ ਸ਼ੁਰੂ ਕੀਤਾ, ਜੋ ਲਗਭਗ ਪੂਰਾ ਹੋ ਚੁੱਕਾ ਸੀ ਜਦੋਂ 1991 ਵਿੱਚ ਦੁਖਦਾਈ ਢੰਗ ਨਾਲ ਉਸ ਦਾ ਕਤਲ ਹੋ ਗਿਆ।

ਉਸ ਦੀ ਯਾਦ ਵਿੱਚ ਇੱਕ ਨਵਾਂ ਖੋਜ ਕੇਂਦਰ ਸਥਾਪਿਤ ਕੀਤਾ ਗਿਆ ਹੈ। ਉਸ ਨੂੰ ਉਸ ਦੀ ਮੁਹਾਰਤ, ਆਸ਼ਾਵਾਦ ਅਤੇ ਨਵੀਨਤਾ ਲਈ ਯਾਦ ਕੀਤਾ ਜਾਂਦਾ ਹੈ।