The National Apology to the Stolen Generations (2008) — Stolen Generations ਤੋਂ ਰਾਸ਼ਟਰੀ ਮੁਆਫ਼ੀ

13 ਫ਼ਰਵਰੀ 2008 ਨੂੰ, ਆਸਟ੍ਰੇਲੀਆ ਦੇ ਪ੍ਰਧਾਨ ਮੰਤਰੀ ਨੇ ਸਾਰੇ ਆਸਟ੍ਰੇਲੀਆਈਆਂ ਵੱਲੋਂ ਬੋਲਦਿਆਂ, ਆਸਟ੍ਰੇਲੀਆਈ ਸੰਸਦ ਵਿੱਚ 'ਚੋਰੀ ਹੋਈਆਂ ਪੀੜ੍ਹੀਆਂ' ਤੋਂ ਕੌਮੀ ਮਾਫ਼ੀ ਮੰਗੀ। ਪ੍ਰਧਾਨ ਮੰਤਰੀ ਨੇ ਬੀਤੇ ਸਮੇਂ ਵਿੱਚ ਆਦਿਵਾਸੀ ਅਤੇ ਟੋਰੇਸ ਸਟ੍ਰੇਟ ਆਈਲੈਂਡਰ ਲੋਕਾਂ ਨਾਲ ਹੋਏ ਸਲੂਕ ਲਈ, ਅਤੇ ਖ਼ਾਸ ਕਰਕੇ ਆਦਿਵਾਸੀ ਤੇ ਟੋਰੇਸ ਸਟ੍ਰੇਟ ਆਈਲੈਂਡਰ ਬੱਚਿਆਂ ਨੂੰ ਉਹਨਾਂ ਦੇ ਮਾਪਿਆਂ ਤੋਂ ਖੋਹਣ ਦੇ ਤਰੀਕੇ ਲਈ, ਮਾਫ਼ੀ ਮੰਗੀ।

ਇਹ ਭਾਸ਼ਣ ਟੈਲੀਵਿਜ਼ਨ ਅਤੇ ਰੇਡੀਓ ਸਟੇਸ਼ਨਾਂ ਉੱਤੇ ਪ੍ਰਸਾਰਿਤ ਹੋਇਆ। ਹਜ਼ਾਰਾਂ ਆਸਟ੍ਰੇਲੀਆਈ ਲੋਕ 'ਸੌਰੀ' ਭਾਸ਼ਣ ਸੁਣਨ ਲਈ ਜਨਤਕ ਥਾਵਾਂ ਅਤੇ ਆਪਣੇ ਕੰਮ ਦੀਆਂ ਥਾਵਾਂ ਉੱਤੇ ਇਕੱਠੇ ਹੋਏ। ਭਾਸ਼ਣ ਵਿੱਚ ਬੀਤੇ ਸਮੇਂ ਦੀਆਂ ਬੇਇਨਸਾਫ਼ੀਆਂ ਨੂੰ ਸਰਕਾਰੀ ਤੌਰ ਉੱਤੇ ਗਿਣਾਇਆ ਗਿਆ ਅਤੇ ਉਹਨਾਂ ਲਈ ਮਾਫ਼ੀ ਮੰਗੀ ਗਈ। ਇਹ ਆਦਿਵਾਸੀ ਅਤੇ ਟੋਰੇਸ ਸਟ੍ਰੇਟ ਆਈਲੈਂਡਰ ਲੋਕਾਂ ਦੇ ਜ਼ਖ਼ਮ ਭਰਨ ਵੱਲ ਅਤੇ ਇਹ ਯਕੀਨੀ ਬਣਾਉਣ ਵੱਲ ਇੱਕ ਅਹਿਮ ਕਦਮ ਸੀ ਕਿ ਇਹ ਬੇਇਨਸਾਫ਼ੀਆਂ ਕਦੇ ਦੁਬਾਰਾ ਨਾ ਹੋਣ। 'ਸੌਰੀ' ਭਾਸ਼ਣ ਸਾਰੇ ਆਸਟ੍ਰੇਲੀਆਈਆਂ ਲਈ ਅੱਗੇ ਵੱਲ ਇੱਕ ਅਹਿਮ ਕਦਮ ਸੀ।

ਅੱਜ, ਆਸਟ੍ਰੇਲੀਆਈ ਪਛਾਣ ਵਿੱਚ ਆਦਿਵਾਸੀ ਅਤੇ ਟੋਰੇਸ ਸਟ੍ਰੇਟ ਆਈਲੈਂਡਰ ਲੋਕਾਂ ਦੇ ਅਨਮੋਲ ਯੋਗਦਾਨ ਨੂੰ ਵਿਆਪਕ ਤੌਰ ਉੱਤੇ ਮੰਨਿਆ ਅਤੇ ਮਨਾਇਆ ਜਾਂਦਾ ਹੈ। ਬਹੁਤ ਸਾਰੇ ਆਦਿਵਾਸੀ ਅਤੇ ਟੋਰੇਸ ਸਟ੍ਰੇਟ ਆਈਲੈਂਡਰ ਲੋਕ ਆਸਟ੍ਰੇਲੀਆਈ ਸਮਾਜ ਵਿੱਚ ਨਿਆਂ ਪ੍ਰਣਾਲੀ, ਸਿਆਸਤ, ਕਲਾਵਾਂ ਅਤੇ ਖੇਡਾਂ ਸਮੇਤ ਮੋਹਰੀ ਅਹੁਦਿਆਂ ਉੱਤੇ ਹਨ।