ਖੇਡਾਂ ਅਤੇ ਮਨੋਰੰਜਨ

ਬਹੁਤ ਸਾਰੇ ਆਸਟ੍ਰੇਲੀਅਨ ਖੇਡਾਂ ਨੂੰ ਪਿਆਰ ਕਰਦੇ ਹਨ ਅਤੇ ਆਸਟ੍ਰੇਲੀਅਨ ਖਿਡਾਰੀਆਂ ਨੇ ਕੌਮਾਂਤਰੀ ਪੱਧਰ 'ਤੇ ਪ੍ਰਭਾਵਸ਼ਾਲੀ ਨਤੀਜੇ ਹਾਸਲ ਕੀਤੇ ਹਨ।

ਸਾਡੇ ਇਤਿਹਾਸ ਦੌਰਾਨ, ਖੇਡਾਂ ਨੇ ਆਸਟ੍ਰੇਲੀਅਨ ਲੋਕਾਂ ਦੀ ਪਛਾਣ ਵੀ ਬਣਾਈ ਹੈ ਅਤੇ ਉਨ੍ਹਾਂ ਨੂੰ ਜੋੜਿਆ ਵੀ ਹੈ। ਮੁੱਢਲੀ ਵਸੇਬੇ ਦੇ ਸਮੇਂ ਤੋਂ, ਖੇਡਾਂ ਸਖ਼ਤ ਜ਼ਿੰਦਗੀ ਦੀਆਂ ਹਕੀਕਤਾਂ ਤੋਂ ਰਾਹਤ ਦਿੰਦੀਆਂ ਸਨ। ਜੰਗ ਦੇ ਸਮੇਂ ਵੀ, ਆਸਟ੍ਰੇਲੀਅਨ ਡਿਫੈਂਸ ਫੋਰਸ (Australian Defence Force) ਦੇ ਮੈਂਬਰ ਜੰਗ ਦੇ ਮੈਦਾਨ ਦੇ ਤਣਾਅ ਨੂੰ ਘਟਾਉਣ ਲਈ ਖੇਡ ਮੁਕਾਬਲੇ ਕਰਵਾਉਂਦੇ ਸਨ।

ਖੇਡਾਂ ਇੱਕ ਸਾਂਝਾ ਮੈਦਾਨ ਵੀ ਦਿੰਦੀਆਂ ਹਨ ਜਿੱਥੇ ਖਿਡਾਰੀ ਅਤੇ ਦਰਸ਼ਕ ਦੋਵੇਂ ਆਪਣੇ ਆਪ ਨੂੰ ਸ਼ਾਮਲ ਅਤੇ ਉਸ ਚੀਜ਼ ਦਾ ਹਿੱਸਾ ਮਹਿਸੂਸ ਕਰਦੇ ਹਨ ਜੋ ਆਸਟ੍ਰੇਲੀਅਨ ਸਮਾਜ ਲਈ ਅਹਿਮ ਹੈ। ਐਬੋਰਿਜਿਨਲ ਅਤੇ ਟੌਰੇਸ ਸਟਰੇਟ ਆਈਲੈਂਡਰ ਅਤੇ ਪਰਵਾਸੀ ਆਸਟ੍ਰੇਲੀਅਨ ਦੇਸ਼ ਦੇ ਸਭ ਤੋਂ ਸਫ਼ਲ ਖਿਡਾਰੀਆਂ ਵਿੱਚ ਸ਼ਾਮਲ ਹਨ।

ਬਹੁਤ ਸਾਰੇ ਆਸਟ੍ਰੇਲੀਅਨ ਟੀਮ ਖੇਡਾਂ ਵਿੱਚ ਹਿੱਸਾ ਲੈਂਦੇ ਹਨ ਜਿਵੇਂ ਕ੍ਰਿਕਟ, ਬਾਸਕਟਬਾਲ, ਨੈੱਟਬਾਲ ਅਤੇ ਹਾਕੀ। ਫੁੱਟਬਾਲ ਦੀਆਂ ਕਿਸਮਾਂ — ਸੌਕਰ, ਰਗਬੀ ਲੀਗ, ਰਗਬੀ ਯੂਨੀਅਨ ਅਤੇ ਖ਼ਾਸ ਆਸਟ੍ਰੇਲੀਅਨ ਖੇਡ ਆਸਟ੍ਰੇਲੀਅਨ ਰੂਲਜ਼ ਫੁੱਟਬਾਲ (Australian Rules Football, 'Aussie Rules') — ਆਸਟ੍ਰੇਲੀਆ ਵਿੱਚ ਖੇਡਣ ਅਤੇ ਵੇਖਣ ਲਈ ਬਹੁਤ ਹਰਮਨਪਿਆਰੀਆਂ ਖੇਡਾਂ ਹਨ। ਤੈਰਾਕੀ, ਟੈਨਿਸ, ਅਥਲੈਟਿਕਸ, ਗੋਲਫ਼, ਸਾਈਕਲਿੰਗ, ਬੁਸ਼ਵਾਕਿੰਗ (bushwalking), ਸਰਫਿੰਗ ਅਤੇ ਸਕੀਇੰਗ ਵੀ ਹਰਮਨਪਿਆਰੀਆਂ ਮਨੋਰੰਜਨ ਗਤੀਵਿਧੀਆਂ ਹਨ।

ਆਸਟ੍ਰੇਲੀਆ ਨੂੰ ਕ੍ਰਿਕਟ ਦੀ ਖੇਡ ਵਿੱਚ ਆਪਣੀ ਕੌਮਾਂਤਰੀ ਕਾਮਯਾਬੀ 'ਤੇ ਖ਼ਾਸ ਮਾਣ ਹੈ। ਆਸਟ੍ਰੇਲੀਅਨ ਅਤੇ ਇੰਗਲਿਸ਼ ਕ੍ਰਿਕਟ ਟੀਮਾਂ 19ਵੀਂ ਸਦੀ ਦੇ ਅਖ਼ੀਰ ਤੋਂ ਸਖ਼ਤ ਵਿਰੋਧੀ ਰਹੀਆਂ ਹਨ।

ਮੈਲਬਰਨ ਕੱਪ (Melbourne Cup), 'ਉਹ ਦੌੜ ਜੋ ਕੌਮ ਨੂੰ ਰੋਕ ਦਿੰਦੀ ਹੈ', ਦੁਨੀਆ ਦੀਆਂ ਸਭ ਤੋਂ ਵੱਡੀਆਂ ਘੋੜ-ਦੌੜਾਂ ਵਿੱਚੋਂ ਇੱਕ ਹੈ। ਪਹਿਲਾ ਮੈਲਬਰਨ ਕੱਪ 1861 ਵਿੱਚ ਹੋਇਆ ਸੀ। ਮੈਲਬਰਨ ਕੱਪ ਨਵੰਬਰ ਦੇ ਪਹਿਲੇ ਮੰਗਲਵਾਰ ਨੂੰ ਹੁੰਦਾ ਹੈ, ਅਤੇ 1877 ਤੋਂ ਵਿਕਟੋਰੀਆ (Victoria) ਵਿੱਚ ਇਸ ਦਿਨ ਜਨਤਕ ਛੁੱਟੀ ਹੁੰਦੀ ਹੈ।

ਸਰ ਡੌਨਲਡ ਬ੍ਰੈਡਮੈਨ (Sir Donald Bradman) (1908–2001)

ਸਰ ਡੌਨਲਡ ਬ੍ਰੈਡਮੈਨ, ਹਰ ਸਮੇਂ ਦਾ ਸਭ ਤੋਂ ਮਹਾਨ ਕ੍ਰਿਕਟ ਬੱਲੇਬਾਜ਼, ਇੱਕ ਆਸਟ੍ਰੇਲੀਅਨ ਖੇਡ ਦੰਤ-ਕਥਾ ਹੈ। ਉਸ ਦਾ ਪਾਲਣ-ਪੋਸ਼ਣ ਨਿਊ ਸਾਊਥ ਵੇਲਜ਼ (New South Wales) ਦੇ ਬੌਰਲ (Bowral) ਵਿੱਚ ਹੋਇਆ, ਅਤੇ ਉਸ ਨੇ ਆਸਟ੍ਰੇਲੀਅਨ ਟੀਮ ਲਈ ਆਪਣਾ ਪਹਿਲਾ ਕ੍ਰਿਕਟ ਮੈਚ 1928 ਵਿੱਚ ਖੇਡਿਆ।

ਉਹ ਪੈਰਾਂ ਦਾ ਹੈਰਾਨਕੁੰਨ ਤੇਜ਼ ਸੀ। 1930 ਵਿੱਚ ਇੰਗਲੈਂਡ ਦੇ ਆਪਣੇ ਪਹਿਲੇ ਦੌਰੇ 'ਤੇ, ਉਸ ਨੇ ਬੱਲੇਬਾਜ਼ੀ ਦੇ ਲਗਭਗ ਸਾਰੇ ਰਿਕਾਰਡ ਤੋੜ ਦਿੱਤੇ। 21 ਸਾਲ ਦੀ ਉਮਰ ਤੱਕ ਉਹ ਪਹਿਲਾਂ ਹੀ ਆਸਟ੍ਰੇਲੀਅਨ ਦੰਤ-ਕਥਾ ਬਣ ਚੁੱਕਾ ਸੀ। 1948 ਵਿੱਚ ਆਪਣੇ ਆਖ਼ਰੀ ਦੌਰੇ 'ਤੇ, ਉਸ ਦੀ ਟੀਮ 'ਦ ਇਨਵਿੰਸੀਬਲਜ਼' ('The Invincibles') ਵਜੋਂ ਜਾਣੀ ਜਾਣ ਲੱਗੀ, ਕਿਉਂਕਿ ਉਨ੍ਹਾਂ ਨੇ ਇੰਗਲੈਂਡ ਖ਼ਿਲਾਫ਼ ਖੇਡਿਆ ਇੱਕ ਵੀ ਮੈਚ ਨਹੀਂ ਹਾਰਿਆ।