ਅੰਤਰਰਾਸ਼ਟਰੀ ਸਹਾਇਤਾ ਅਤੇ ਮਾਨਵਤਾਵਾਦੀ ਯਤਨ

ਆਸਟ੍ਰੇਲੀਆਈ ਸਰਕਾਰ ਦਾ ਅੰਤਰਰਾਸ਼ਟਰੀ ਸਹਾਇਤਾ ਪ੍ਰੋਗਰਾਮ ਵਿਕਾਸਸ਼ੀਲ ਦੇਸ਼ਾਂ ਦੀ ਗਰੀਬੀ ਘਟਾਉਣ ਅਤੇ ਟਿਕਾਊ ਵਿਕਾਸ ਹਾਸਲ ਕਰਨ ਵਿੱਚ ਮਦਦ ਕਰਦਾ ਹੈ। ਇਹ ਸਹਾਇਤਾ ਲੋਕਾਂ ਅਤੇ ਸਰਕਾਰਾਂ ਦੀ ਮਦਦ ਰਾਹੀਂ ਇਸ ਖੇਤਰ ਵਿੱਚ ਅਤੇ ਦੁਨੀਆ ਭਰ ਵਿੱਚ ਦਿੱਤੀ ਜਾਂਦੀ ਹੈ।

ਜਦੋਂ ਸਾਡੇ ਦੇਸ਼ ਵਿੱਚ ਜਾਂ ਵਿਦੇਸ਼ ਵਿੱਚ ਆਫ਼ਤਾਂ ਆਉਂਦੀਆਂ ਹਨ ਤਾਂ ਆਸਟ੍ਰੇਲੀਆਈ ਲੋਕ ਬਹੁਤ ਵੱਡੀ ਦਰਿਆਦਿਲੀ ਦਿਖਾਉਂਦੇ ਹਨ। ਅਸੀਂ ਉਨ੍ਹਾਂ ਦੇਸ਼ਾਂ ਨੂੰ ਵੀ ਨਿਯਮਿਤ ਤੌਰ ’ਤੇ ਦਾਨ ਦਿੰਦੇ ਹਾਂ ਜਿਹੜੇ ਲਗਾਤਾਰ ਦੁੱਖ ਝੱਲ ਰਹੇ ਹਨ — ਨਿੱਜੀ ਦਾਨ ਰਾਹੀਂ ਅਤੇ ਆਸਟ੍ਰੇਲੀਆ ਦੇ ਸਹਾਇਤਾ ਪ੍ਰੋਗਰਾਮ ਰਾਹੀਂ।

2018 ਵਿੱਚ, ਡਾ. ਰਿਚਰਡ ਹੈਰਿਸ (Dr Richard Harris) ਅਤੇ ਡਾ. ਕ੍ਰੇਗ ਚੈਲਨ (Dr Craig Challen) ਨੂੰ ਥਾਈਲੈਂਡ ਵਿੱਚ ਪਾਣੀ ਨਾਲ ਭਰੀ ਗੁਫ਼ਾ ਪ੍ਰਣਾਲੀ ਵਿੱਚੋਂ 12 ਕਿਸ਼ੋਰਾਂ ਅਤੇ ਉਨ੍ਹਾਂ ਦੇ ਫੁੱਟਬਾਲ ਕੋਚ ਨੂੰ ਬਚਾਉਣ ਦੇ ਯਤਨਾਂ ਲਈ ਆਸਟ੍ਰੇਲੀਆ ਦਾ ਦੂਜਾ ਸਭ ਤੋਂ ਵੱਡਾ ਬਹਾਦਰੀ ਸਨਮਾਨ, ਸਟਾਰ ਆਫ਼ ਕਰੇਜ (the Star of Courage), ਅਤੇ ਨਾਲ ਹੀ ਮੈਡਲ ਆਫ਼ ਦ ਆਰਡਰ ਆਫ਼ ਆਸਟ੍ਰੇਲੀਆ (Medal of the Order of Australia, OAM) ਦਿੱਤਾ ਗਿਆ।