ਅੰਤਰਰਾਸ਼ਟਰੀ ਮੰਚਾਂ ਵਿੱਚ ਸਰਗਰਮ ਭਾਗੀਦਾਰੀ

ਆਸਟ੍ਰੇਲੀਆ 1945 ਵਿੱਚ ਸੰਯੁਕਤ ਰਾਸ਼ਟਰ (United Nations, UN) ਦੇ ਮੁੱਢ ਤੋਂ ਹੀ ਇਸ ਦਾ ਸਰਗਰਮ ਮੈਂਬਰ ਰਿਹਾ ਹੈ। ਆਸਟ੍ਰੇਲੀਆ ਉਨ੍ਹਾਂ ਲੋਕਾਂ ਨੂੰ ਸੁਰੱਖਿਆ ਦਿੰਦਾ ਹੈ ਜਿਨ੍ਹਾਂ ਨੂੰ 1951 ਦੀ UN ਸ਼ਰਨਾਰਥੀ ਸੰਧੀ (UN Refugee Convention) ਹੇਠ ਸ਼ਰਨਾਰਥੀ ਮੰਨਿਆ ਗਿਆ ਹੈ। ਇਹ UN ਦੇ ਸ਼ਾਂਤੀ-ਰੱਖਿਆ ਯਤਨਾਂ ਅਤੇ ਵਿਕਾਸਸ਼ੀਲ ਦੇਸ਼ਾਂ ਲਈ ਮਾਨਵੀ ਤੇ ਐਮਰਜੈਂਸੀ ਸਹਾਇਤਾ ਵਿੱਚ ਵੀ ਯੋਗਦਾਨ ਪਾਉਂਦਾ ਹੈ, ਅਤੇ UN ਵਿੱਦਿਅਕ, ਵਿਗਿਆਨਕ ਤੇ ਸੱਭਿਆਚਾਰਕ ਸੰਗਠਨ (UNESCO) ਵਿੱਚ ਇਸ ਦੀ ਮਜ਼ਬੂਤ ਸ਼ਮੂਲੀਅਤ ਹੈ।

1971 ਵਿੱਚ, ਆਸਟ੍ਰੇਲੀਆ ਆਰਥਿਕ ਸਹਿਯੋਗ ਅਤੇ ਵਿਕਾਸ ਸੰਗਠਨ (Organisation for Economic Cooperation and Development, OECD) ਦਾ ਪੂਰਾ ਮੈਂਬਰ ਬਣਿਆ। OECD ਦਾ ਮਕਸਦ ਵਿਸ਼ਵ ਵਪਾਰ ਵਧਾਉਂਦੇ ਹੋਏ ਦੁਨੀਆ ਭਰ ਦੇ ਲੋਕਾਂ ਦੀ ਆਰਥਿਕ ਅਤੇ ਸਮਾਜਿਕ ਭਲਾਈ ਨੂੰ ਬਿਹਤਰ ਬਣਾਉਣਾ ਹੈ।

ਆਸਟ੍ਰੇਲੀਆ ਏਸ਼ੀਆ-ਪ੍ਰਸ਼ਾਂਤ ਖੇਤਰ ਵਿੱਚ ਨੇੜਲੇ ਸਹਿਯੋਗ ਦਾ ਪੱਕਾ ਸਮਰਥਕ ਹੈ। ਇਹ ਏਸ਼ੀਆ-ਪ੍ਰਸ਼ਾਂਤ ਆਰਥਿਕ ਸਹਿਯੋਗ (Asia-Pacific Economic Cooperation), ਪੂਰਬੀ ਏਸ਼ੀਆ ਸੰਮੇਲਨ (East Asia Summit) ਅਤੇ ਪ੍ਰਸ਼ਾਂਤ ਟਾਪੂ ਮੰਚ (Pacific Islands Forum) ਦਾ ਸਰਗਰਮ ਮੈਂਬਰ ਹੈ। ਇਹ ਦੱਖਣ-ਪੂਰਬੀ ਏਸ਼ੀਆਈ ਦੇਸ਼ਾਂ ਦੇ ਸੰਘ (Association of Southeast Asian Nations) ਦਾ ਗੱਲਬਾਤ ਭਾਈਵਾਲ ਹੈ ਅਤੇ ਇਸ ਦੇ ਖੇਤਰੀ ਮੰਚ (Regional Forum) ਵਿੱਚ ਹਿੱਸਾ ਲੈਂਦਾ ਹੈ।

ਡਾ. ਕੈਥਰੀਨ ਹੈਮਲਿਨ AC (Dr Catherine Hamlin AC) (ਜਨਮ 1924–2020)

ਡਾ. ਕੈਥਰੀਨ ਹੈਮਲਿਨ ਇੱਕ ਜ਼ਨਾਨਾ-ਰੋਗ ਮਾਹਰ ਸੀ, ਜੋ ਨੌਜਵਾਨ ਇਥੋਪੀਆਈ ਔਰਤਾਂ ਨੂੰ ਦੁੱਖਾਂ ਭਰੀ ਜ਼ਿੰਦਗੀ ਤੋਂ ਬਚਾਉਣ ਲਈ ਮਸ਼ਹੂਰ ਸੀ। 1959 ਤੋਂ, ਡਾ. ਹੈਮਲਿਨ ਇਥੋਪੀਆ ਦੇ ਅਦੀਸ ਅਬਾਬਾ ਵਿੱਚ ਕੰਮ ਕਰਦੀ ਰਹੀ ਅਤੇ ‘ਪ੍ਰਸੂਤੀ ਫਿਸਟੁਲਾ’ (obstetric fistula) ਵਜੋਂ ਜਾਣੀ ਜਾਂਦੀ ਜਣੇਪੇ ਦੀ ਸੱਟ ਵਾਲੀਆਂ ਔਰਤਾਂ ਦੀ ਮਦਦ ਕਰਦੀ ਰਹੀ। ਇਸ ਅੰਦਰੂਨੀ ਸੱਟ ਵਾਲੀਆਂ ਔਰਤਾਂ ਆਪਣੇ ਸਰੀਰਕ ਕਾਰਜਾਂ ਉੱਤੇ ਕਾਬੂ ਨਹੀਂ ਰੱਖ ਸਕਦੀਆਂ ਅਤੇ ਉਨ੍ਹਾਂ ਨੂੰ ਸ਼ਰਮਿੰਦਾ ਕੀਤਾ ਜਾਂਦਾ ਹੈ ਤੇ ਆਪਣੇ ਭਾਈਚਾਰਿਆਂ ਵਿੱਚੋਂ ਬਾਹਰ ਕੱਢ ਦਿੱਤਾ ਜਾਂਦਾ ਹੈ।

ਡਾ. ਹੈਮਲਿਨ ਅਤੇ ਉਸ ਦੇ ਪਤੀ ਨੇ ਅਦੀਸ ਅਬਾਬਾ ਫਿਸਟੁਲਾ ਹਸਪਤਾਲ (Addis Ababa Fistula Hospital) ਸਥਾਪਤ ਕੀਤਾ। ਉਨ੍ਹਾਂ ਦੇ ਯਤਨਾਂ ਸਦਕਾ ਹਜ਼ਾਰਾਂ ਔਰਤਾਂ ਘਰ ਪਰਤ ਕੇ ਭਰਪੂਰ ਅਤੇ ਸਿਹਤਮੰਦ ਜ਼ਿੰਦਗੀ ਜੀ ਸਕੀਆਂ।

1995 ਵਿੱਚ, ਡਾ. ਹੈਮਲਿਨ ਨੂੰ ਕੰਪੈਨੀਅਨ ਆਫ਼ ਦ ਆਰਡਰ ਆਫ਼ ਆਸਟ੍ਰੇਲੀਆ (Companion of the Order of Australia) ਬਣਾਇਆ ਗਿਆ, ਜੋ ਆਸਟ੍ਰੇਲੀਆ ਦਾ ਸਭ ਤੋਂ ਵੱਡਾ ਸਨਮਾਨ ਹੈ।