स्नोवी माउन्टेन्स जलविद्युत् योजना (The Snowy Mountains Hydro-Electric Scheme)

1949 मा सरकारले पूर्वी भिक्टोरियामा समुद्रतर्फ बग्नुअघि नै स्नोई नदी (Snowy River) को पानी सङ्कलन गर्ने साहसिक योजनाको काम सुरु गर्‍यो। यो पानीलाई सिँचाइका लागि भित्री भू-भागतर्फ बगाइयो र विद्युत् उत्पादनमा प्रयोग गरियो। यो विशाल परियोजना पूरा हुन 25 वर्ष लाग्यो।

यो अस्ट्रेलियाको सबैभन्दा ठूलो इन्जिनियरिङ परियोजना हो। यो विश्वकै सबैभन्दा ठूला जलविद्युत् योजनाहरूमध्ये एक पनि हो र आधुनिक सिभिल इन्जिनियरिङका विश्व आश्चर्यहरूमध्ये एक मानिन्छ।

स्नोई माउन्टेन्स योजना (Snowy Mountains Scheme) न्यु साउथ वेल्सको कोसियस्को राष्ट्रिय निकुञ्ज (Kosciusko National Park) मा अवस्थित छ। यसमा 16 वटा ठूला बाँध, सात वटा विद्युत् गृह, एउटा पम्पिङ स्टेसन र 225 किलोमिटर सुरुङ, पाइपलाइन तथा जलनहरहरू छन्। यसको धेरैजसो भाग भूमिगत छ। यो योजनाले भित्री न्यु साउथ वेल्स र भिक्टोरियाका फार्महरूलाई अत्यावश्यक पानी उपलब्ध गराउँछ। यसका विद्युत् गृहहरूले न्यु साउथ वेल्सको बिजुलीको 10 प्रतिशतसम्म उत्पादन गर्छन्।

यस योजनाको काम 1949 मा सुरु भई 1974 मा सकियो। 30 भन्दा बढी देशका 100,000 भन्दा बढी मानिसले यस परियोजनामा काम गरे। यीमध्ये सत्तरी प्रतिशत कामदार आप्रवासी थिए। परियोजना पूरा भएपछि धेरैजसो युरोपेली कामदार अस्ट्रेलियामै रहे र अस्ट्रेलियाको बहुसांस्कृतिक समाजमा आफ्नो बहुमूल्य योगदान जारी राखे।

स्नोई माउन्टेन्स योजना अस्ट्रेलियाको स्वतन्त्र, बहुसांस्कृतिक र साधनसम्पन्न देशका रूपमा रहेको पहिचानको महत्त्वपूर्ण प्रतीक हो।