अस्ट्रेलियन अफ द इयर (Australian of the Year)

1960 देखि, अस्ट्रेलियन अफ द इयर पुरस्कारले अग्रणी अस्ट्रेलियालीहरूको उपलब्धि र योगदानलाई सम्मान गर्दै आएको छ। जुनसुकै पेसा वा पृष्ठभूमिका अस्ट्रेलियालीलाई जोकोहीले यो पुरस्कारका लागि मनोनयन गर्न सक्छ।

अस्ट्रेलियन अफ द इयर तिनै मानिस हुन् जसले आफ्नो काममा उत्कृष्टता हासिल गरेका छन् र राष्ट्रको सेवा गरेका छन्। उनीहरूले हामीलाई अझ राम्रो अस्ट्रेलिया बनाउन आफ्नै योगदान दिन प्रेरणा दिन्छन् र चुनौती दिन्छन्।

यी पुरस्कारमा यङ अस्ट्रेलियन अफ द इयर, सिनियर अस्ट्रेलियन अफ द इयर र अस्ट्रेलियाज लोकल हिरो पर्छन्।

हालका र पहिलेका विजेताहरूको सूची www.australianoftheyear.org.au मा उपलब्ध छ।

डा. जेम्स म्युके AM

नेत्र शल्यचिकित्सक र अन्धोपन रोकथामका अग्रणी — 2020 का अस्ट्रेलियन अफ द इयर

डा. म्युके साइट फर अल (Sight For All) का सह-संस्थापक हुन्, जुन अनुसन्धान, शिक्षा, पूर्वाधार र साझेदार देशका सहकर्मीहरूको तालिममार्फत अन्धोपन हटाउने लक्ष्य राख्ने एक परोपकारी संस्था हो।

डा. म्युके अन्धोपनलाई मानव अधिकारको विषय मान्छन् र सबैले देख्न सक्ने संसार बनाउन काम गरिरहेका छन्।

प्राध्यापक मिशेल सिमन्स (जन्म 1967)

क्वान्टम भौतिकशास्त्रकी प्राध्यापक — 2018 की अस्ट्रेलियन अफ द इयर

प्राध्यापक सिमन्स आणविक इलेक्ट्रोनिक्स र क्वान्टम कम्प्युटिङकी अग्रणी हुन्। उनी जसलाई “कम्प्युटिङ युगको अन्तरिक्ष दौड” भन्छिन्, त्यसको अग्रपंक्तिमा रहेर प्राध्यापक सिमन्सको लक्ष्य त्यस्तो क्वान्टम कम्प्युटर बनाउने हो जसले हजारौं वर्ष लाग्ने समस्याहरू केही मिनेटमै समाधान गर्न सकोस्। यस्तो खोजले औषधि डिजाइन, मौसम पूर्वानुमान, स्वचालित सवारी, कृत्रिम बुद्धिमत्ता र अन्य धेरै क्षेत्रमा क्रान्ति ल्याउन सक्ने सम्भावना छ।

2018 मा, क्वान्टम सूचना विज्ञानमा उनको काम र समर्पणका लागि प्राध्यापक सिमन्सलाई अस्ट्रेलियन अफ द इयर घोषित गरियो। 2019 मा, उनको “क्वान्टम र आणविक इलेक्ट्रोनिक्समा अगुवाका रूपमा र आदर्श व्यक्तित्वका रूपमा विज्ञान शिक्षामा गरेको उल्लेखनीय सेवा” को कदर गर्दै उनलाई अर्डर अफ अस्ट्रेलियाको अफिसर नियुक्त गरियो।