अस्ट्रेलियाली मुद्रा

हाम्रो मुद्रामा भएका चित्रहरूले अस्ट्रेलियाका लागि महत्त्वपूर्ण मानिस र प्रतीकहरू देखाउँछन्।

हाम्रो मुद्रामा राखिने मानिसहरू ती हुन् जसले सामाजिक सुधार, विज्ञान, राजनीति, सैन्य उपलब्धि र कलाका क्षेत्रमा पहल र ठूलो प्रतिभा देखाएका छन्।

रानी एलिजाबेथ द्वितीय (1926–2022)

रानी एलिजाबेथ द्वितीय अस्ट्रेलियाकी राष्ट्रप्रमुख थिइन्। उनी अस्ट्रेलिया र संयुक्त अधिराज्यकी रानी थिइन्। आफ्नो लामो र लोकप्रिय शासनकालभरि उनी एक बलियो र स्थिर उपस्थिति थिइन्।

संसद भवन (Parliament House) र फोरकोर्ट मोजाइक

संसद भवनको रूपरेखा योजना डिजाइन डेभलपमेन्ट ल्यान्डस्केप प्लानमा आधारित थियो, जुन पार्लियामेन्ट हाउस कन्स्ट्रक्सन अथोरिटीले उपलब्ध गराएको थियो। फोरकोर्ट मोजाइक माइकल नेल्सन जगमाराको ‘Possum and Wallaby Dreaming’ शीर्षकको सेन्ट्रल डेजर्ट थोप्ला-शैलीको चित्रमा आधारित छ।

डेम मेरी गिलमोर (1865–1962)

डेम मेरी गिलमोर एक लेखक, पत्रकार, कवि र सामाजिक सुधारका अभियन्ता थिइन्। उनलाई उनको लेखन र महिला, गरिब मानिस, तथा आदिवासी र टोरेस स्ट्रेट टापु जनताको पक्षमा बोलेकामा सम्झिइन्छ।

AB ‘ब्यान्जो’ प्याटर्सन (1864–1941)

एन्ड्रयु बार्टन प्याटर्सन एक कवि, गीतकार र पत्रकार थिए। उनी ‘Banjo’ Paterson नामले लेख्थे र विशेष गरी अस्ट्रेलियाको सबैभन्दा प्रसिद्ध लोकगीत ‘Waltzing Matilda’ का शब्द लेखेकामा सम्झिइन्छन्।

रेभरेन्ड जोन फ्लिन (1880–1951)

रेभरेन्ड जोन फ्लिनले संसारकै पहिलो हवाई चिकित्सा सेवा, रोयल फ्लाइङ डक्टर सर्भिस अफ अस्ट्रेलिया, सुरु गरे। अस्ट्रेलियाका टाढाका क्षेत्रमा स्वास्थ्य सेवा पुर्‍याएर धेरै ज्यान बचाएकामा उनलाई सम्झिइन्छ।

मेरी राइबी (1777–1855)

मेरी राइबी न्यु साउथ वेल्स उपनिवेशकी अग्रणी व्यवसायी महिला थिइन्। किशोर उमेरमा कैदी बसोबासकर्ताका रूपमा अस्ट्रेलिया आएपछि, उनी समुदायमा सम्मानित अगुवा बनिन्।

एडिथ कोवन (1861–1932)

एडिथ कोवन एक समाजसेवी, राजनीतिज्ञ र नारीवादी थिइन्। उनी कुनै पनि अस्ट्रेलियाली संसदमा निर्वाचित हुने पहिलो महिला थिइन्।

डेभिड उनाइपोन (1872–1967)

डेभिड उनाइपोन एक लेखक, सार्वजनिक वक्ता र आविष्कारक थिए। उनलाई विज्ञान र साहित्यमा उनको योगदान, तथा आदिवासी र टोरेस स्ट्रेट टापु जनताको अवस्था सुधार गरेकामा सम्झिइन्छ।

सर जोन मोनास (1865–1931)

सर जोन मोनास एक इन्जिनियर, प्रशासक र अस्ट्रेलियाका सबैभन्दा महान् सैन्य कमान्डरहरूमध्ये एक थिए। उनलाई उनको नेतृत्व, बुद्धिमत्ता र वाक्पटुताका लागि सम्झिइन्छ।

डेम नेली मेल्बा (1861–1931)

डेम नेली मेल्बा विश्वप्रसिद्ध सोप्रानो गायिका थिइन्। संसारभरि ‘Queen of Song’ (गीतकी रानी) नामले चिनिने उनी अन्तर्राष्ट्रिय ख्याति कमाउने पहिलो अस्ट्रेलियाली गायिका थिइन्।