کھیل اور تفریح

بہت سے آسٹریلوی کھیل سے محبت کرتے ہیں اور آسٹریلوی کھلاڑیوں نے بین الاقوامی سطح پر متاثر کن نتائج حاصل کیے ہیں۔

ہماری پوری تاریخ میں کھیل نے آسٹریلوی عوام کی پہچان بھی بنائی ہے اور اُنہیں متحد بھی کیا ہے۔ ابتدائی آبادکاری سے ہی کھیل ایک سخت زندگی کی حقیقتوں سے فرار کا ذریعہ تھا۔ جنگ کے دنوں میں بھی آسٹریلوی دفاعی فورس (Australian Defence Force) کے ارکان میدانِ جنگ کے دباؤ کو کم کرنے کے لیے کھیلوں کے مقابلے منعقد کرتے تھے۔

کھیل ایک ایسی مشترکہ بنیاد بھی فراہم کرتا ہے جس سے کھلاڑی اور تماشائی دونوں خود کو شامل محسوس کرتے ہیں اور ایسی چیز کا حصہ سمجھتے ہیں جو آسٹریلوی معاشرے کے لیے اہم ہے۔ ابوریجنل اور ٹورس اسٹریٹ آئی لینڈر اور تارکینِ وطن آسٹریلوی ملک کے کامیاب ترین کھلاڑیوں میں شامل ہیں۔

بہت سے آسٹریلوی ٹیم کھیلوں میں حصہ لیتے ہیں جیسے کرکٹ، باسکٹ بال، نیٹ بال اور ہاکی۔ فٹ بال کی اقسام یعنی ساکر، رگبی لیگ، رگبی یونین اور خاص طور پر آسٹریلوی کھیل آسٹریلین رولز فٹ بال (Australian Rules Football, ‘Aussie Rules’) آسٹریلیا میں کھیلنے اور دیکھنے کے لیے بہت مقبول ہیں۔ تیراکی، ٹینس، ایتھلیٹکس، گالف، سائیکلنگ، بش واکنگ، سرفنگ اور اسکیئنگ بھی مقبول تفریحی سرگرمیاں ہیں۔

آسٹریلیا کو کرکٹ کے کھیل میں اپنی بین الاقوامی کامیابی پر خاص فخر ہے۔ آسٹریلوی اور انگلش کرکٹ ٹیمیں 19ویں صدی کے آخر سے سخت حریف رہی ہیں۔

میلبرن کپ (Melbourne Cup)، ’وہ ریس جو قوم کو روک دیتی ہے‘، دنیا کی سب سے بڑی گھڑ دوڑوں میں سے ایک ہے۔ پہلا میلبرن کپ 1861 میں منعقد ہوا۔ میلبرن کپ نومبر کے پہلے منگل کو ہوتا ہے، اور 1877 سے وکٹوریہ میں عام تعطیل ہے۔

سر ڈونلڈ بریڈمین (Sir Donald Bradman) (1908–2001)

سر ڈونلڈ بریڈمین، ہر دور کے سب سے عظیم کرکٹ بلے باز، ایک آسٹریلوی کھیل کے لیجنڈ ہیں۔ اُن کی پرورش باؤرل، نیو ساؤتھ ویلز (Bowral, New South Wales) میں ہوئی، اور اُنہوں نے آسٹریلوی ٹیم کے لیے اپنا پہلا کرکٹ میچ 1928 میں کھیلا۔

وہ اپنے قدموں پر حیرت انگیز طور پر تیز تھے۔ 1930 میں انگلینڈ کے اپنے پہلے دورے پر اُنہوں نے بلے بازی کے تقریباً تمام ریکارڈ توڑ دیے۔ 21 سال کی عمر تک وہ پہلے ہی ایک آسٹریلوی لیجنڈ بن چکے تھے۔ 1948 میں اپنے آخری دورے پر اُن کی ٹیم ’دی انونسیبلز‘ (‘The Invincibles’) کے نام سے مشہور ہوئی، کیونکہ اُنہوں نے انگلینڈ کے خلاف کھیلا گیا ایک بھی میچ نہیں ہارا۔