بین الاقوامی فورمز میں سرگرم شرکت

آسٹریلیا 1945 میں اقوامِ متحدہ (UN) کے آغاز سے ہی اُس کا فعال رکن رہا ہے۔ آسٹریلیا اُن لوگوں کو تحفظ فراہم کرتا ہے جنہیں 1951 کے اقوامِ متحدہ کے کنونشن برائے پناہ گزین کے تحت پناہ گزین قرار دیا گیا ہو۔ یہ اقوامِ متحدہ کی امن کارروائیوں اور ترقی پذیر ممالک کے لیے انسانی و ہنگامی امداد میں بھی حصہ ڈالتا ہے، اور اقوامِ متحدہ کے تعلیمی، سائنسی اور ثقافتی ادارے میں اِس کی مضبوط شرکت ہے۔

1971 میں آسٹریلیا تنظیم برائے اقتصادی تعاون و ترقی (OECD) کا مکمل رکن بن گیا۔ OECD کا مقصد عالمی تجارت کو بڑھاتے ہوئے دنیا بھر کے لوگوں کی معاشی اور سماجی بہبود کو بہتر بنانا ہے۔

آسٹریلیا ایشیا پیسیفک خطے میں قریبی تعاون کی بھرپور حمایت کرتا ہے۔ یہ ایشیا پیسیفک اکنامک کوآپریشن، ایسٹ ایشیا سمٹ اور پیسیفک آئی لینڈز فورم کا فعال رکن ہے۔ یہ ایسوسی ایشن آف ساؤتھ ایسٹ ایشین نیشنز کا مکالماتی شراکت دار ہے اور اُس کے علاقائی فورم میں شریک ہوتا ہے۔

ڈاکٹر کیتھرین ہیملن AC (Catherine Hamlin) (1924–2020)

ڈاکٹر کیتھرین ہیملن ماہرِ امراضِ نسواں تھیں، جو نوجوان ایتھوپیائی خواتین کو زندگی بھر کی تکلیف سے بچانے کے لیے مشہور ہیں۔ 1959 سے ڈاکٹر ہیملن ایتھوپیا کے شہر ادیس ابابا میں اُن خواتین کی مدد کرتی رہیں جنہیں بچے کی پیدائش کے دوران ’آبسٹیٹرک فسٹولا‘ نامی چوٹ لگی ہو۔ اِس اندرونی چوٹ کا شکار خواتین اپنے جسمانی افعال پر قابو نہیں رکھ سکتیں، جس سے وہ ذلت محسوس کرتی ہیں اور اپنی برادریوں سے الگ کر دی جاتی ہیں۔

ڈاکٹر ہیملن اور اُن کے شوہر نے ادیس ابابا فسٹولا ہسپتال قائم کیا۔ اُن کی کوششوں کی بدولت ہزاروں خواتین اپنے گھروں کو لوٹ کر بھرپور اور صحت مند زندگی گزار سکیں۔

1995 میں ڈاکٹر ہیملن کو آرڈر آف آسٹریلیا کا کمپینین (Companion of the Order of Australia) بنایا گیا، جو آسٹریلیا کا سب سے بڑا اعزاز ہے۔